Трамп Россияга қарши глобал нефть эмбаргосини жиддий кўриб чиқмоқда – “Times”

АҚШ Президенти Дональд Трамп Россия билан нефть бўйича савдо қилаётган давлатларга, жумладан Хитой, Ҳиндистон ва Туркияга нисбатан қаттиқ иккиламчи санкциялар жорий этиш имкониятини ўрганмоқда. Бу ҳақда “The Times” хабар берди.

Қайд этилишича, гап Россиядан импорт қилинадиган маҳсулотларга 500 фоизлик бож солиғи киритилишини назарда тутувчи қонун лойиҳасини қўллаб-қувватлаш ҳақида бормоқда. Нашрнинг ёзишича, Трампнинг позициясидаги бу ўзгаришга Россия Президенти Владимир Путиннинг Киев билан музокаралардан бош тортиши ва Украинадаги фуқаролик объектларига зарбалар беришни давом эттираётгани сабаб бўлган. Аввал Трамп бу қонун лойиҳасини “ҳаддан ташқари қаттиқ” деб атаган бўлса, энди у “диққат билан кўриб чиқилмоқда”, деб баён қилган.

Нашрга кўра, асосий масала – бу чора-тадбирлардан келиб чиқадиган иқтисодий оқибатлар хавфи. Оқ уй санкцияларни бекор қилиш ҳуқуқи Президент ваколатларида қолишини истайди, Конгресс эса бу жараёнга чеклов қўйишни таклиф қилмоқда. Таҳлилчиларга кўра, ушбу чоралар қисман жорий этилганда ҳам Россия иқтисодиётига жиддий зарар етказиши мумкин.

Вашингтондаги Ташқи сиёсат тадқиқотлари институти эксперти Максимилиан Хесс нашрга берган изоҳида Трамп Россиядан нефть сотиб олаётган мамлакатларга нисбатан 500 фоизлик тариф жорий этишдан воз кечиши мумкинлигини айтган. Чунки бу чоралар энергия нархларининг кескин ошишига олиб келиши эҳтимолдан холи эмас.

Эслатиб ўтамиз, аввалроқ Дональд Трамп NBC News телеканалига берган интервьюсида жорий йилнинг 14 июль куни Россия бўйича “муҳим баёнот” билан чиқишини эълон қилганди. Трамп интервью давомида Россиядан ҳафсаласи пир бўлганини айтиб, яқин ҳафталарда вазият қандай ривожланиши бўйича кузатув кетаётганини билдирган. Бироқ батафсил тафсилотларни очиқламаган.