Жонсон Зеленскийга бошпана таклиф қилганини очиқлади

Буюк Британия Бош вазири Борис Жонсон Украина Президенти Владимир Зеленский билан Россия “ҳарбий амалиёти” туфайли уни эвакуация қилиш имкониятини муҳокама қилган. Бу ҳақда Жонсоннинг ўзи маълум қилди. 

“Биз буларнинг барчасини анча вақт олдин муҳокама қилганмиз. Агар ҳамма нарса ёмон бўлиб кетса, нима бўлади деган савол биринчи масала эди. Айтишим керакки, Владимир (Зеленский) ҳар доим жуда аниқ гапирган: у Украина халқи олдида мажбурияти борлигини, уларга ғамхўрлик қилиш учун у ерда (Украинада) қолишини айтган”, деган Бош вазир “The Sunday Times” газетасига берган интервьюсида. 

Жонсон Россиянинг Украинада давом этаётган “ҳарбий амалиёти”га қарамай, Киевга ташриф буюриши мумкинлигини инкор этмаган. 

“Мен уни (Зеленскийни) ҳар қандай тарзда қўллаб-қувватлашни жуда хоҳлайман. Бу (ташриф) менинг қўллаб-қувватлашимни кўрсатишнинг самарали усули бўладими, билмайман, лекин стратегик, сиёсий, иқтисодий ва маънавий жиҳатдан (Россия Президенти Владимир) Путиннинг муваффақиятсизликка учраши ва Зеленскийнинг муваффақиятга эришиши жуда муҳим”, деган Жонсон.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.