Жиззахда янги туғилган чақалоқ ўғирлаб кетилди

Жиззах вилояти Зафаробод туманида нотаниш аёл шифохонадан янги туғилган эгизаклардан бирини ўғирлаб кетди. Бу ҳақда вилоят Ички ишлар бошқармаси хабар берди.

Қайд этилишича, Республика ихтисослаштирилган она ва бола саломатлиги илмий-амалий маркази Жиззах филиалида жорий йил 31 январь куни тахминан кечки соат 19:30 ларда 25-30 ёшлардаги юзига тиббий ниқоб таққан нотаниш аёл Зафаробод тумани Ёрқин шаҳарчасида яшовчи аёлнинг хонасига кириб, “болангизни шифокор кўригига олиб бораман”, деб чақалоқни олиб кетган ва қайтиб келмаган. 

Билдирилишича, ўша куни ички ишлар органлари ходимлари томонидан олиб борилган тадбирлар давомида ўғирланган чақалоқ топилган. Ушбу чақалоқни олиб кетган шахс процессуал тартибда қўлга олинган. Унга нисбатан Жиззах шаҳар прокуратураси томонидан Ўзбекистон Республикаси Жиноят кодексининг 137-моддаси (одам ўғирлаш) 2-қисми тегишли бандлари билан жиноят иши қўзғатилган бўлиб, дастлабки тергов ҳаракатлари олиб борилмоқда.

Эслатиб ўтамиз, Тошкент шаҳридаги кўчалардан бирида пакет ичида янги туғилган чақалоқ топилган эди. Воқеа жойига етиб борган ходимлар чақалоқни текшириб кўрган ва шифохонага олиб борган. Унга зарур тиббий ёрдам кўрсатилган. Тез тиббий ёрдам шифокорининг айтишича, чақалоқнинг туғилганига тахминан бир соат бўлган. Унинг киндиги ҳам ноодатий усулда кесилган.