Жиззахда фуқарони шахсий суратлари билан шантаж қилган тадбиркор ушланди (видео)

Жиззах вилоятининг Ғаллаорол туманида фуқарони шахсий ҳаётига оид суратлар ва ёзишмаларини интернет ҳамда қариндошларига тарқатиш билан қўрқитиб, ундан 9 миллион сўм талаб қилган шахс ушланди. Бу ҳақда Ички ишлар вазирлиги хабар берди.

Аниқланишича, 1988 йилда туғилган, Ғаллаорол туманида яшовчи фуқаро ички ишлар органларига мурожаат қилган. У 1995 йилда Наманган вилоятининг Норин туманида туғилган, ҳозирда Жиззах шаҳрида якка тартибдаги тадбиркорлик фаолияти билан шуғулланувчи шахс унинг шахсий ҳаётига оид суратлар ва ўзаро ёзишмалар скриншотларини интернет тармоқлари ҳамда яқин қариндошларига тарқатиш билан таҳдид қилаётганини билдирган.

Қайд этилишича, мазкур материалларни ўчириб юбориш ва ҳеч кимга тарқатмаслик эвазига ундан жами 9 миллион сўмлик кредит қарзларини тўлаб бериш талаб қилинган.

Олиб борилган тезкор тадбир давомида ушбу шахс процессуал тартибда ушланган. Ундан далилий ашё сифатида видеотасвирлар ва ёзишмалар сақланган мобил телефон аппарати белгиланган тартибда ҳужжатлаштириб олинган.

Билдирилишича, ҳозирда мазкур ҳолат юзасидан терговга қадар текширув ҳаракатлари олиб борилмоқда. Жиноят кодексининг 165-моддаси (Товламачилик) билан жиноят иши қўзғатиш чоралари кўрилмоқда.

Эслатиб ўтамиз, аввалроқ Андижонда шахсий фото ва видеоларни тарқатиб юбориш билан қўрқитиб, пул талаб қилган уч нафар шахс ушланган эди.