Жиззахда эркак куёви томонидан ўласи қилиб дўппосланди

Жиззахда келинлик уйидан қизининг буюмларини олиб кетишга борган эркак қизининг эри ва қариндошлари томонидан кўр бўлиб қолгунича дўппосланди. Бу ҳақда “Немолчи” лойиҳасида хабар берилди. Ички ишлар вазирининг матбуот котиби Шохруҳ Ғиёсов ушбу ҳолатни QALAMPIR.UZ’га тасдиқлади.

Маълум қилинишича, унинг қизи 2024 йилда У.А. га турмушга чиққан. Улар Жиззахда яшаб келган. Тўйдан кейинги илк кунларданоқ эри қизни мунтазам равишда уриб-дўппослаб, ҳақоратлаб ва руҳий тазйиқ ўтказиб келган. Ҳатто аёлининг ҳомиладорлиги ҳам эрни тўхтатиб қолмаган.

Қайд этилишича, қиз ота-онасини хавотирга солмаслик учун ҳаммасига чидаб келган. Чунки у отаси учун бундай муносабат ҳақидаги хабар оғир зарба бўлишини билган. Шу боис, у индамай чидаган, танасидаги кўкарган жойларни эса яширган.

“Келин юзида табассум билан қайнона ва эрининг кўнглини олишга уринган, балки бу уларнинг шафқатсизлигини юмшатар, деб умид қилган. Афсуски, бу ёрдам бермади, қийноқлар давом этаверди. 2026 йил 23 май куни тонг саҳарда Нодира отасидан уни бу дўзахдан олиб кетишини сўради”, дейилади хабарда.

Лойиҳага кўра, қизнинг отаси уни Тошкентга олиб кетган. Бир неча кундан сўнг эса қариндошлари билан бирга қизининг шахсий буюмлари, ҳужжатлари ва неварасининг нарсаларини олиб кетиш учун Жиззахга борган. У ерда уларни бир неча киши кутиб турган бўлган. Низо келиб чиқиши мумкинлигини сезган отаси ва унинг яқинлари воқеа содир бўлишидан тахминан 45-60 дақиқа аввал 102 хизматига қўнғироқ қилган. Бироқ, отанинг сўзларига кўра, профилактика инспектори SMS орқали “ярашиб олсангиз, хабар беринг”, деб ёзган. Бироқ низо шафқатсиз дўппослашга айланиб кетган.

“Менинг кузатишимча, асосий зарбаларни Т. ва А.У. лар, уларнинг катта ва кичик тоғалари ҳамда менга номаълум бўлган новча ёш йигит беришди. Йиқилганимдан кейин ҳам уришда давом этишди – мени тепишни бошлашди. Оила аъзоларим менга ёрдам беришга уринишди, лекин уларни куч билан ушлаб туришди. Зарбалaрдан ҳушимни йўқотдим, аммо яқинларимнинг айтишича, ҳатто ўшанда ҳам мени дўппослаб, тепишган”, дея тасвирлаган отаси кейинги воқеаларни.

Манбага кўра, кейинчалик ўша профилактика инспектори жабрланувчининг ўзини ва унинг оиласини ҳужум қилганликда айблашга уринган, уларнинг оиласини, шу жумладан 11 ёшли болани ҳам бир неча соат давомида ИИБда ушлаб турган.

Тиббий ҳужжатларда отада бош мия жароҳати, мия чайқалиши, чап кўзнинг шикастланиши ҳамда пешона ва қош соҳасидаги жароҳатлар қайд этилган. Ота чап кўзидан айрилиб, кўр бўлиб қолган, ҳозирда эса ўнг кўзининг ҳам кўриши ёмонлашиб бормоқда.

Ички ишлар вазирининг матбуот котиби Шохруҳ Ғиёсовнинг QALAMPIR.UZ’га маълум қилишича, ҳолат юзасидан Жиноят Кодексининг 104-моддаси (Қасддан баданга оғир шикаст етказиш) 1- қисми билан жиноят иши қўзғатилган. Ҳозирда Жиззах Ички ишлар бошқармаси томонидан тергов ҳаракатлари олиб борилмоқда.

Эслатиб ўтамиз, аввалроқ Жиззах вилоятида келин бир неча ой давомида унитаз сувини ичишга, суваракка қарши заҳарни ейишга мажбурлангани ва устидан қайноқ сув қуйилгани ҳақида хабар берилган эди.