Зеленский Лукашенкога “ультиматум” қўйди

Украина Президенти Владимир Зеленский Беларусь фуқароси Александр Лукашенкога Россия дронларининг Украина шаҳарларига зарбаларини мувофиқлаштиришда фойдаланилаётган ретрансляторларни олиб ташлаш учун бир ҳафта вақт берди. Бу ҳақда у Киевда Гондурас Президенти Насри Асфура билан ўтказган матбуот анжуманида маълум қилди.

Зеленскийнинг айтишича, Украина билан чегарадош икки вилоят ҳудудида жойлашган махсус ускуналар Россия дронларининг ҳаракатларини мувофиқлаштиришга хизмат қилмоқда.

“Агар Лукашенко урушда иштирок этишни истамаслигини айтаётган бўлса, у ҳолда бу ускуналарни олиб ташласин ёки ўчириб қўйсин. Бунинг учун бир ҳафта етарли. Агар у бундай қилмаса, буни биз амалга оширамиз”, деган Зеленский.

Шунингдек, Украина раҳбари Беларусь Россия армияси учун нефть маҳсулотларини етказиб берувчи асосий давлатлардан бири эканини таъкидлаган. Унинг фикрича, бу таъминотни тўхтатиш имконияти Лукашенконинг ўзида мавжуд.

Аввалроқ, Лукашенко “Al Arabiya” телеканалига берган интервьюсида Украина билан урушга қўшилмаслигини билдириб, Зеленский ҳақида айтган кескин сўзлари учун ундан узр сўраган эди.

“Агар Владимир Александрович хафа бўлган бўлса, бу сўзларим учун ундан узр сўрайман”, деган Лукашенко.

Унинг таъкидлашича, Беларусьнинг урушга қўшилиши Россия учун яна 1,5 минг километрлик қўшимча фронт очилишига олиб келади ва мамлакат ҳарбий жиҳатдан анча заиф ҳолатда қолади.