Евроиттифоқ Алишер Усмоновни санкциялар рўйхатидан чиқарди

Европа Иттифоқи Россиялик миллиардерлар Алишер Усмонов ва Михаил Фридманни санкциялар рўйхатидан чиқаришга келишди. Бу ҳақда “Meduza” хабар берди. 

Қайд этилишича, Европа Иттифоқига аъзо давлатларнинг доимий вакиллари USM Holdings асосчиси Алишер Усмонов ҳамда “Альфа-групп” ҳаммуассиси Михаил Фридманни санкциялар рўйхатидан чиқариш бўйича келишувга эришган.

Россияга қарши санкциялар рўйхатида жами қарийб 3 минг нафар жисмоний ва юридик шахс бор. Илгари ушбу чекловлар ҳар 6 ойда барча 27 давлатнинг розилиги билан узайтириб келинган. Янги келишувга кўра, санкциялар 2029 йил 22 сентябрга қадар амал қилади.

Усмонов ва Фридманга нисбатан санкцияларни бекор қилиш масаласи сўнгги ҳафталарда ЕИ давлатлари ўртасида келишмовчиликларга сабаб бўлганди. Аввал Словакия, кейин Франция Усмоновни санкциялар рўйхатидан чиқаришни талаб қилган. Люксембург эса Фридманга нисбатан чекловларни бекор қилишни сўраган.

Франция ўз талабини миллий хавфсизлик масалалари билан изоҳлаган. Маълумотларга кўра, Парижнинг Усмонов бўйича позицияси Озарбайжон билан маҳбусларни озод қилиш бўйича музокаралар билан боғлиқ бўлган. Усмоновни санкциялар рўйхатидан чиқаришни Туркия ва Ўзбекистон ҳам илгари қўллаб-қувватлаган.

Фридман масаласида Люксембургнинг позицияси эса бизнесменнинг мамлакат ҳукуматига қарши 16 миллиард долларлик даъвоси билан боғланган. У мазкур даъвони 2024 йилда активлари музлатилганига жавобан киритган.

Кеча, 22 сентябрь ҳолатига кўра, Латвия Усмонов ва Фридманга нисбатан санкцияларни бекор қилишга қарши чиққан Европа Иттифоқидаги ягона давлат бўлган. Бироқ кейинчалик Рига ўз ветосини қайтариб олиб, “конструктив бетарафлик” позициясини танлаган.

Шундан сўнг ЕИ Кенгаши Россияга қарши санкцияларни 2029 йил 22 сентябргача узайтирганини расман маълум қилди. Баёнотда 3 нафар жисмоний шахс ва битта ташкилотнинг санкция рўйхатидаги муддати узайтирилмагани айтилган.

Усмонов ва Фридманга қарши санкциялар Европа Иттифоқи томонидан 2022 йилда, Россиянинг Украинага қарши кенг кўламли уруши бошланганидан кўп ўтмай жорий этилган эди. ЕИ расмийлари ўша вақтда уларни Россия Президенти Владимир Путиннинг яқин доирасига кирувчи шахслар сифатида баҳолаган.

Санкциялар сабаб Фридман инвестиция гуруҳи LetterOne директорлар кенгашини тарк этган, шунингдек, “Альфа-банк” ва “Альфа-страхование”даги улушларини сотган.

Маълумот учун, Усмонов ва Фридман санкцияларини бекор қилиш масаласи аввал ҳам Европа Иттифоқида муҳокама қилинган. Жорий йилнинг март ойида Венгрия ва Словакия ҳам уларни санкциялар рўйхатидан чиқаришни талаб қилган эди.

Эслатиб ўтамиз, аввалроқ Латвия Бош вазири Андрис Кулбергс Россия билан боғлиқ ўзбек миллиардери Алишер Усмонов ва россиялик миллиардер Михаил Фридманга нисбатан Европа Иттифоқи санкцияларини бекор қилиш эвазига бошқа минглаб шахс ва компанияларга қўйилган чекловларни узайтириш бўйича таклифни рад этгани ҳақида хабар берилган эди.