ЕИ Марказий Осиё ва Кавказни Европа билан боғлашга 12 млрд евро ажратмоқчи

Европа Иттифоқи Марказий Осиё ва Жанубий Кавказни Европа бозори билан бевосита боғлаши керак бўлган Ўрта коридорни ривожлантиришга 12 млрд еврогача давлат ва хусусий инвестицияларни жалб қилиш ниятида. Бу ҳақда жорий йилнинг 16 сентябрь куни Европа комиссияси раиси Урсула фон дер Ляйен “Иттифоқнинг аҳволи тўғрисида”ги йиллик мурожаатномасида маълум қилди.

Европа комиссияси раҳбарига кўра, молиялаштиришни Европанинг Global Gateway ташаббуси орқали сафарбар қилиш режалаштирилмоқда.

“Бизнинг мақсадимиз – йўналишларни диверсификация қилиш, савдо оқимларини уч бараварга ошириш ва 2030 йилга бориб юк ташиш муддатини кескин қисқартиришдан иборат. Лойиҳани амалга ошириш учун Европа комиссияси Болгария Бош вазири билан биргаликда транспорт алоқаларини ривожлантириш бўйича минтақавий саммит ташкил этади”, дейди фон дер Ляйен.

Фон дер Ляйен халқаро шерикликни ривожлантиришни Европанинг стратегик танлови ҳамда қоидаларга асосланган халқаро тизимдаги парчаланишга берилган жавоб деб атаган. Шу билан бирга, эълон қилинган 12 млрд евро аллақачон ажратилган маблағлар эмас, балки жалб қилинадиган инвестицияларнинг мақсадли ҳажми сифатида кўрсатилган. Эълон қилинган нутқда молиялаштиришнинг мамлакатлар ва муайян объектлар ўртасидаги тақсимоти очиқланмаган.

“Транскаспий халқаро транспорт маршрути” сифатида ҳам танилган Ўрта коридор Россия ҳудудини четлаб ўтиб, Хитой ва Европани Қозоғистон, Каспий денгизи, Озарбайжон ва Грузия орқали боғлайди. Грузиядан юклар қуруқлик орқали Туркия орқали ёки денгиз орқали Қора денгиз орқали ЕИ мамлакатларига ўтиши мумкин.

Эслатиб ўтамиз, аввалроқ Қозоғистоннинг Туркистон шаҳрида ўтказилган Туркий давлатлар ташкилотининг норасмий саммитида Ўзбекистон Президенти Шавкат Мирзиёев Ўрта коридорни “Хитой – Қирғизистон – Ўзбекистон” темир йўли билан боғлашни таклиф қилганди.