YeI Markaziy Osiyo va Kavkazni Yevropa bilan bog‘lashga 12 mlrd yevro ajratmoqchi

Yevropa Ittifoqi Markaziy Osiyo va Janubiy Kavkazni Yevropa bozori bilan bevosita bog‘lashi kerak bo‘lgan O‘rta koridorni rivojlantirishga 12 mlrd yevrogacha davlat va xususiy investitsiyalarni jalb qilish niyatida. Bu haqda joriy yilning 16 sentyabr kuni Yevropa komissiyasi raisi Ursula fon der Lyayen “Ittifoqning ahvoli to‘g‘risida”gi yillik murojaatnomasida ma’lum qildi.

Yevropa komissiyasi rahbariga ko‘ra, moliyalashtirishni Yevropaning Global Gateway tashabbusi orqali safarbar qilish rejalashtirilmoqda.

“Bizning maqsadimiz – yo‘nalishlarni diversifikatsiya qilish, savdo oqimlarini uch baravarga oshirish va 2030 yilga borib yuk tashish muddatini keskin qisqartirishdan iborat. Loyihani amalga oshirish uchun Yevropa komissiyasi Bolgariya Bosh vaziri bilan birgalikda transport aloqalarini rivojlantirish bo‘yicha mintaqaviy sammit tashkil etadi”, deydi fon der Lyayen.

Fon der Lyayen xalqaro sheriklikni rivojlantirishni Yevropaning strategik tanlovi hamda qoidalarga asoslangan xalqaro tizimdagi parchalanishga berilgan javob deb atagan. Shu bilan birga, e’lon qilingan 12 mlrd yevro allaqachon ajratilgan mablag‘lar emas, balki jalb qilinadigan investitsiyalarning maqsadli hajmi sifatida ko‘rsatilgan. E’lon qilingan nutqda moliyalashtirishning mamlakatlar va muayyan ob’ektlar o‘rtasidagi taqsimoti ochiqlanmagan.

“Transkaspiy xalqaro transport marshruti” sifatida ham tanilgan O‘rta koridor Rossiya hududini chetlab o‘tib, Xitoy va Yevropani Qozog‘iston, Kaspiy dengizi, Ozarbayjon va Gruziya orqali bog‘laydi. Gruziyadan yuklar quruqlik orqali Turkiya orqali yoki dengiz orqali Qora dengiz orqali YeI mamlakatlariga o‘tishi mumkin.

Eslatib o‘tamiz, avvalroq Qozog‘istonning Turkiston shahrida o‘tkazilgan Turkiy davlatlar tashkilotining norasmiy sammitida O‘zbekiston Prezidenti Shavkat Mirziyoyev O‘rta koridorni “Xitoy – Qirg‘iziston – O‘zbekiston” temir yo‘li bilan bog‘lashni taklif qilgandi.