Венесуэлада сафарбарлик эълон қилинди

АҚШ ҳужумидан сўнг бугун, 5 январь куни Венесуэла ҳукумати мамлакат Қуролли кучлари сафарбар этилишини эълон қилди ҳамда нефть саноати ва бошқа ишлаб чиқариш тармоқлари ходимлари учун ҳарбий режим жорий этди. Бу ҳақда мамлакатнинг ҳуқуқий ҳужжатлар порталида эълон қилинган фармонда сўз боради. 

“Зудлик билан бутун мамлакат ҳудудида миллий Қуролли кучларни сафарбар этиш ва хорижий агрессияни қайтариш учун миллий қудратнинг мавжуд салоҳиятидан фойдаланиш буюрилад. Давлат инфратузилмаси, нефть саноати ва бошқа асосий давлат ишлаб чиқариш жараёнлари ҳарбийлаштирилади. Бундай корхоналар ходимлари вақтинча ҳарбий режим остида бўлади”, дейилади ҳужжатда.

Шунингдек, фармон мамлакатнинг қуруқлик, ҳаво ва денгиз чегараларида патруллаш ҳамда қўриқлашни кучайтиришни ҳам назарда тутади.

Мазкур фармон эълон қилинган кундан бошлаб 90 кун давомида амал қилади. Қайд этиш жоиз, ҳужжат 3 январь санаси билан расмийлаштирилган бўлиб, унинг остида президент Николас Мадуронинг, шунингдек витсе-президент ва ҳукумат аъзоларининг имзолари мавжуд.

Эслатиб ўтамиз, жорий йил 3 январь куни тунда Венесуэла пойтахти Каракас шаҳрида портлашлар содир бўлганди. Шундан сўнг АҚШ Президенти Дональд Трамп Қўшма Штатлар Венесуэлага кенг кўламли зарбалар берганини, Венесуэла президенти Николас Мадуро эса рафиқаси билан бирга қўлга олиниб, мамлакатдан олиб чиқиб кетилганини билдирди.

АҚШ расмийлари эр-хотинни “наркотерроризм”да айбламоқда, яқин вақт ичида улар АҚШ судида жавоб беради.

Ҳозирда Венесуэла вице-президенти Делси Родригес мамлакат президенти вазифасини вақтинча бажарувчи этиб тайинланган. У Мадуро ва унинг рафиқасини зудлик билан озод қилишни талаб қилмоқда. Маълум қилинишича, улар аллақачон Бруклиндаги (Нью-Йорк) тергов изоляторига етказилган.

Дастлабки маълумотларга кўра, АҚШнинг Венесуэлада ўтказган операцияси оқибатида камида 40 киши ҳалок бўлган.