Венесуэлада фавқулодда ҳолат эълон қилинди

Венесуэла ҳукумати бугун, 3 январь куни Каракас ва пойтахт шимолидаги ҳудудларда содир бўлган бир қатор портлашлардан сўнг фавқулодда ҳолат эълон қилди. Бу ҳақда “Associated Press” хабар берди. 

“Баёнотга кўра, Президент Николас Мадуро барча миллий мудофаа режаларини амалга оширишни буюрди ва ташқи аралашув остида фавқулодда ҳолат эълон қилди. 

Ҳамма кўчаларга!  Ҳукумат мамлакатдаги барча ижтимоий ва сиёсий кучларни сафарбарлик режаларини фаоллаштиришга ва бу империалистик ҳужумни қайтаришга чақиради”, дейилган баёнотда. 

Шу билан бирга, АҚШ Федерал авиация маъмурияти “давом этаётган ҳарбий фаолия” туфайли Венесуэла ҳаво ҳудудида барча тижорат рейсларини тақиқлаган. 

Эслатиб ўтамиз, бугун, 3 январь куни эрталабдан бери Венесуэла пойтахтида ва мамлакатнинг бошқа аҳоли пунктларида портлашлар содир бўлгани ҳақида хабар берилган эди.

Бунинг ортидан Колумбия Президенти Густаво Петро Венесуэла пойтахти Каракас ҳарбий ҳужумга учраётганини маълум қилди.

Қайд этиш жоиз, 2025 йил куз бошида АҚШ Кариб денгизи ҳудудига ўзининг энг замонавий Gerald Ford авиация ташувчисини, эсминецлар ва қирувчи самолётларни юборган эди. Сентябрь ойидан буён гиёҳванд моддалар ташиётган кемаларга зарбалар берилмоқда. АҚШ Президенти Дональд Трамп маъмурияти Николас Мадурони Венесуэланинг ҳуқуқий президенти сифатида тан олмайди ва мамлакат ҳукуматини наркотрафикка қарши етарлича кураш олиб бормаётганликда айблайди.

17 декабрь куни Трамп Венесуэлага бораётган ва ундан чиқаётган, санкциялар остидаги барча нефть танкерларини тўлиқ блокадага олиш буйруғини берганини эълон қилган.

Сентябрь бошида CNN Трамп Венесуэла ҳудудидаги наркокартелларга зарба бериш вариантини кўриб чиқаётганини хабар берган эди. Бироқ ноябрь ўрталарига келиб, Трамп Венесуэлада қуруқликдаги ҳарбий операция ўтказиш ёки ўтказмаслик бўйича ҳали қарор қабул қилмагани маълум қилинган.