Трамп Президент Мадурони олиб қочиш режасини қандай тузганини айтиб берди

АҚШ Президенти Дональд Трамп Венесуэла Президенти Николас Мадурони қўлга олиш бўйича операцияни бир ҳафтадан кўпроқ вақт олдин, Рождестводан олдин, 25 декабрь куни маъқуллаган. Бу ҳақда NBC телеканали ўз манбаларига таяниб хабар берди. 

Қайд этилишича, Трамп Венесуэладаги АҚШ ҳарбийлари ва ҳуқуқни муҳофаза қилиш органлари томонидан ўтказилган операцияни бир ҳафтадан кўпроқ вақт олдин маъқуллаган.  

“Режа Рождестводан олдин тасдиқланган ва афтидан, операциянинг аниқ вақти ўшандан бери деярли соатбай муҳокама қилинган”, дейилади телеканал эфирида. 

Трампнинг ўзи эса Николас Мадурони қўлга олиш операциясини 2-4 кун аввалга режалаштиргани, аммо ёмон об-ҳаво шароити сабаб уни кейинга қолдиришга мажбур бўлганини айтмоқда. У бу ҳақда “Fox News” телеканали эфиридаги баёнотда гапирган. 

“Биз буни тўрт кун олдин қилмоқчи эдик, лекин об-ҳаво мукаммал эмас эди. Об-ҳаво мукаммал бўлиши керак”, дейди Трамп. 

Унинг билдиришича, Николас Мадурони мамлакатдан олиб чиқиб кетиш операцияси Каракасда об-ҳаво яхшиланиб, парвозларни амалга оширишга рухсат берилгач, хамирдан қил суғургандек осон кечган. 

Дональд Трамп Венесуэладаги операцияни Флорида штатининг Уэст-Палм-Бич яқинидаги Мар-а-Лаго қароргоҳидан кузатиб борганини айтди.  

“Бизда хона бор эди ва биз [операциянинг] ҳар бир жиҳатини кузатиб бордик. Бизни кўплаб одамлар, жумладан, генераллар қуршаб олган эди, нима бўлаётганини ҳамма биларди. Бу жуда мураккаб, ниҳоятда мураккаб [операция] эди”, дейди Оқ уй раҳбари. 

Маълумот учун, АҚШ Бош прокурори Памела Жо Бондига кўра, Мадуро ва унинг рафиқаси Силия Флоресга “наркотерроризм”, қурол сақлаш ва гиёҳванд моддалар контрабандаси айбловлари қўйилган. Расмий Москва АҚШни Венесуэла Президенти ва унинг рафиқасини озод қилишга чақирмоқда. Венесуэла Бош прокурори Тарек Уильям Сааб Қўшма Штатлардан Венесуэла Президенти Николас Мадуро ва унинг рафиқаси Силия Флореснинг тириклигини тасдиқлашни талаб қилди ҳамда уларнинг тақдири учун Америка маъмуриятини жавобгар деб атади. 

АҚШнинг Венесуэлага ҳужуми

Эслатиб ўтамиз, 3 январь куни Венесуэла пойтахти Каракас шаҳрида камида еттита портлаш содир бўлди. Портлаш товушлари шаҳарнинг турли ҳудудларида, шунингдек Симон Боливар номидаги Майкетия аэропорти ва Ла-Гуайра порти атрофида ҳам эшитилган.

Кейинроқ Колумбия Президенти Густаво Петро АҚШни Венесуэлани бомбардимон қилишда айблаб, БМТнинг фавқулодда йиғилишини йиғишга чақирди. Шундан сўнг CBS телеканали АҚШ Президенти Дональд Трамп Венесуэла ҳудудидаги қатор объектларга, жумладан ҳарбий нишонларга зарба бериш буйруғини берганини маълум қилди.

Венесуэла Президенти Николас Мадуро мамлакатда кенг қамровли мудофаа тизимини зудлик билан ишга тушириш ва миллий кучларни сафарбар этиш бўйича буйруқ берди. Мамлакатда фавқулодда ҳолат режими эълон қилинди.

Кейинчалик Дональд Трамп Венесуэлага қилинган ҳужум бўйича баёнот бериб, Мадуро рафиқаси билан бирга қўлга олингани ва мамлакатдан олиб чиқиб кетилганини маълум қилди.