“Мадурони озод қилинг!” Путин Россияси АҚШга талаб қўйди

Расмий Москва АҚШни Венесуэла Президенти ва унинг рафиқасини озод қилишга чақирмоқда. Бу ҳақдаги баёнот Россия Ташқи ишлар вазирлигининг сайтида эълон қилинди. 

“Венесуэла Президенти Николас Мадуро ва унинг рафиқаси Қўшма Штатларда ҳибсда сақланаётгани ҳақидаги тасдиқланган хабарларни инобатга олган ҳолда, биз Америка раҳбариятини ушбу позицияни қайта кўриб чиқишга ва суверен мамлакатнинг қонуний сайланган Президенти ва унинг рафиқасини озод қилишга чақирамиз. 

Биз Қўшма Штатлар ва Венесуэла ўртасидаги мавжуд муаммоларни мулоқот орқали ҳал қилиш учун шароит яратиш зарурлигини таъкидлаймиз”, дейилади баёнотда. 

АҚШнинг Венесуэлага ҳужуми

Эслатиб ўтамиз, 3 январь куни Венесуэла пойтахти Каракас шаҳрида камида еттита портлаш содир бўлди. Портлаш товушлари шаҳарнинг турли ҳудудларида, шунингдек Симон Боливар номидаги Майкетия аэропорти ва Ла-Гуайра порти атрофида ҳам эшитилган.

Кейинроқ Колумбия Президенти Густаво Петро АҚШни Венесуэлани бомбардимон қилишда айблаб, БМТнинг фавқулодда йиғилишини йиғишга чақирди. Шундан сўнг CBS телеканали АҚШ Президенти Дональд Трамп Венесуэла ҳудудидаги қатор объектларга, жумладан ҳарбий нишонларга зарба бериш буйруғини берганини маълум қилди.

Венесуэла Президенти Николас Мадуро мамлакатда кенг қамровли мудофаа тизимини зудлик билан ишга тушириш ва миллий кучларни сафарбар этиш бўйича буйруқ берди. Мамлакатда фавқулодда ҳолат режими эълон қилинди.

Кейинчалик Дональд Трамп Венесуэлага қилинган ҳужум бўйича баёнот бериб, Мадуро рафиқаси билан бирга қўлга олингани ва мамлакатдан олиб чиқиб кетилганини маълум қилди. АҚШ Бош прокурори Памела Жо Бондига кўра, Мадуро ва унинг рафиқаси Силия Флоресга “наркотерроризм”, қурол сақлаш ва гиёҳванд моддалар контрабандаси айбловлари қўйилган.