Венесуэла пойтахтида портлашлар содир бўлди (видео)

Бугун, 3 январь куни Венесуэла пойтахти Каракасда портлашлар содир бўлди. Шаҳарнинг йирик ҳарбий база жойлашган жанубий қисмида электр таъминоти узилган. Бу ҳақда гувоҳларга таяниб, “Reuters” хабар берди.

Маълумотларга кўра, шаҳарда камида еттита портлаш овози эшитилган. “Bloomberg”нинг ёзишича, Каракас аҳолиси кучли портлашлар ва шаҳар узра учиб ўтаётган самолётлар ҳақида хабар бермоқда, бунинг оқибатида шаҳарнинг кўплаб ҳудудларида электр ўчган. Шунингдек, шаҳарнинг бир нечта туманларида ўқ товушлари ҳам эшитилган.

Ижтимоий тармоқларда Венесуэла пойтахти узра АҚШ ҳарбий вертолётлари учиб юрганини акс эттирувчи видеолар тарқалмоқда. Бироқ бу маълумот ҳозирча расман тасдиқланмаган.

Эслатиб ўтамиз, 2025 йил куз бошида АҚШ Кариб денгизи ҳудудига ўзининг энг замонавий “Gerald Ford” авиация ташувчисини, эсминецлар ва қирувчи самолётларни юборган эди. Сентябрь ойидан буён гиёҳванд моддалар ташиётган кемаларга зарбалар берилмоқда. АҚШ Президенти Дональд Трамп маъмурияти Николас Мадурони Венесуэланинг ҳуқуқий президенти сифатида тан олмайди ва мамлакат ҳукуматини наркотрафикка қарши етарлича кураш олиб бормаётганликда айблайди.

17 декабрь куни Трамп Венесуэлага бораётган ва ундан чиқаётган, санкциялар остидаги барча нефть танкерларини тўлиқ блокадага олиш буйруғини берганини эълон қилган. 

Сентябрь бошида CNN Трамп Венесуэла ҳудудидаги наркокартелларга зарба бериш вариантини кўриб чиқаётганини хабар берган эди. Бироқ ноябрь ўрталарига келиб, Трамп Венесуэлада қуруқликдаги ҳарбий операция ўтказиш ёки ўтказмаслик бўйича ҳали қарор қабул қилмагани маълум қилинган.