Мадуро ва янгамиз тириклигини исботланг – Бош прокурор

Венесуэла Бош прокурори Тарек Уильям Сааб Қўшма Штатларни Венесуэла Президенти Николас Мадуро ва унинг рафиқаси Силия Флореснинг тириклигини тасдиқлашга чақирди ва уларнинг тақдири учун Америка маъмуриятини жавобгар деб атади. 

“Республика Бош прокурори сифатида мен нафақат қуролли кучлар қўмондони ва давлат раҳбари Николас Мадуро Морос ва унинг рафиқаси тириклигини тасдиқлашни сўрайман, балки [Венесуэла] Президенти ва инқилоб етакчиси билан содир бўлиши мумкин бўлган ҳар қандай нарса учун Қўшма Штатларни жавобгар деб биламан”, дейди Сааб.

Шунингдек, Бош прокурор Президент Николас Мадуронинг ўғирланишини ва тинч аҳолининг қурбон бўлишига олиб келган АҚШ ҳаво ҳужумларини қоралашга чақирди. 

“Мен БМТ ва халқаро инсон ҳуқуқлари ташкилотларидан бегуноҳ одамларнинг ўлимига ва Президент Мадуронинг ўғирланишига олиб келган бу қўрқоқ ҳужумларни қоралашни сўрайман”, дейди у. 

АҚШнинг Венесуэлага ҳужуми

Эслатиб ўтамиз, 3 январь куни Венесуэла пойтахти Каракас шаҳрида камида еттита портлаш содир бўлди. Портлаш товушлари шаҳарнинг турли ҳудудларида, шунингдек Симон Боливар номидаги Майкетия аэропорти ва Ла-Гуайра порти атрофида ҳам эшитилган.

Кейинроқ Колумбия Президенти Густаво Петро АҚШни Венесуэлани бомбардимон қилишда айблаб, БМТнинг фавқулодда йиғилишини йиғишга чақирди. Шундан сўнг CBS телеканали АҚШ Президенти Дональд Трамп Венесуэла ҳудудидаги қатор объектларга, жумладан ҳарбий нишонларга зарба бериш буйруғини берганини маълум қилди.

Венесуэла Президенти Николас Мадуро мамлакатда кенг қамровли мудофаа тизимини зудлик билан ишга тушириш ва миллий кучларни сафарбар этиш бўйича буйруқ берди. Мамлакатда фавқулодда ҳолат режими эълон қилинди.

Кейинчалик Дональд Трамп Венесуэлага қилинган ҳужум бўйича баёнот бериб, Мадуро рафиқаси билан бирга қўлга олингани ва мамлакатдан олиб чиқиб кетилганини маълум қилди. АҚШ Бош прокурори Памела Жо Бондига кўра, Мадуро ва унинг рафиқаси Силия Флоресга “наркотерроризм”, қурол сақлаш ва гиёҳванд моддалар контрабандаси айбловлари қўйилган.