Трамп Венесуэла қирғоқларига 16 минг кишилик ҳарбий куч юборди – ОАВ

АҚШ Кариб ҳавзасида тахминан 16 минг ҳарбий хизматчидан иборат бўлган ҳарбий гуруҳни жойлаштиришни бошлади. Бу ҳақда “The Washington Post” нашри хабар берди.

“Кариб ҳавзасида жойлаштирилган америкалик ҳарбий хизматчилар тахминий сони 10 минг аскар ва 6 минг денгизчи. Бу маълумотлар 31 октябрь ҳолатига тегишли бўлиб, Пентагон томонидан эълон қилинган ва тасдиқланган кемалар сонига асосланади”, дейилади хабарда.

Нашрга кўра, ҳозирда Кариб ҳавзасида АҚШ денгиз флотининг саккизта кемаси ва атом сувости кемаси жойлашган. Шунингдек, у ерга Gerald Ford авиаташувчи гуруҳи йўл олган бўлиб, унинг кейинги ҳафтада етиб бориши кутилмоқда.

Жорий йилнинг сентябрь ва октабр ойларида АҚШ Қуролли кучлари Венесуэла соҳиллари яқинида наркотик ташишда гумон қилинган катерларни йўқ қилиш учун бир неча бор ҳарбий куч ишлатган. ОАВ хабарига кўра, Вашингтон энди Венесуэла ҳудудида жойлашган нишонларга зарба бериш имкониятини ҳам кўриб чиқмоқда.

“Newsweek” нашрининг хабар беришича, АҚШнинг USS Iwo Jima десант кемаси ва уни кузатиб бораётган бошқа кемалар Венесуэланинг Ла-Орчила оролидан тахминан 200 километр узоқликда жойлашган. Бу масофа эҳтимолий ҳарбий операцияларни ўтказиш учун етарли доирага тўғри келади.

Шунингдек, манбаларга таяниб, “Miami Herald” газетасининг ёзишича, АҚШ яқин соатлар ёки кунларда Венесуэла ҳудудидаги нишонларга ҳаво зарбалари бериши мумкин.

Эслатиб ўтамиз, аввалроқ Бирлашган Миллатлар Ташкилоти АҚШнинг Кариб денгизи ва Тинч океанида гиёҳванд моддалар савдоси билан шуғулланаётган деб тахмин қилинаётган кемаларга қарши амалга оширган ҳаво ҳужумларини инсон ҳуқуқлари бўйича халқаро ҳуқуқни бузиш деб ҳисоблаб, уларни тўхтатишга чақирганди.