АҚШ Венесуэлага иккинчи зарбага тайёр, аммо... – Трамп

Қўшма Штатлар Венесуэлага иккинчи зарбалар тўлқинига тайёр эди, аммо бу зарур эмас. Бу ҳақда АҚШ Президенти Дональд Трамп “Fox News” эфирида маълум қилди. 

“Биз зарбаларнинг иккинчи тўлқинига тайёр эдик. Бизда ҳамма нарса тайёр эди, лекин бу биринчи тўлқин шунчалик ҳалокатли, шунчалик кучли эдики, биз бунга мажбур эмас эдик. Лекин биз тайёрмиз. Бизда у ерда ҳеч ким кўрмаган армада бор”, дейди Трамп.

Унинг алоҳида қайд этишича, Вашингтон маъмурияти Венесуэланинг сиёсий келажаги борасида қарорлар қабул қилмоқчи ва Қўшма Штатлар бу жараёнларда иштирок этади. 

“Биз ҳозир шу масалани ҳал қиляпмиз. Биз бошқа бировнинг ҳокимиятни эгаллашига йўл қўйиб, у Венесуэлада Мадуро қолдирган меросни давом эттиришига йўл қўя олмаймиз. Шундай қилиб, биз ҳозир қарор қабул қиляпмиз. Биз жуда фаол иштирок этамиз. Биз одамларга эркинлик бермоқчимиз. Биз ажойиб муносабатларга эга бўлишни хоҳлаймиз”, дейди Трамп. 

Унинг айтишича, Қўшма Штатлар кутилганидек Венесуэла нефть секторида жиддий иштирокчига айланади. 

“Мен биздан жуда фаол бўлишимизни кутаман, холос”, дейди у Боливар Республикаси нефть секторининг келажаги ҳақидаги саволга жавоб берар экан.

Трампга кўра, ҳозирги вазиятга қарамай, Венесуэладан Хитойга нефть етказиб бериш давом этади. У АҚШ-Хитой муносабатларида ҳеч қандай муаммо бўлишини кутмаётганини очиқлаган.  

“Мен бу ҳақда ҳеч нарса билмайман, лекин мен Президент Си Цзиньпин билан жуда яхши муносабатларга эгаман ва ҳеч қандай муаммо бўлмайди. Улар ўз нефтларини олишади. Биз одамларга ўз нефтларини олишларига рухсат берамиз”, дейди Трамп.

Маълумот учун, АҚШ Бош прокурори Памела Жо Бондига кўра, Мадуро ва унинг рафиқаси Силия Флоресга “наркотерроризм”, қурол сақлаш ва гиёҳванд моддалар контрабандаси айбловлари қўйилган. Расмий Москва АҚШни Венесуэла Президенти ва унинг рафиқасини озод қилишга чақирмоқда. Венесуэла Бош прокурори Тарек Уильям Сааб Қўшма Штатлардан Венесуэла Президенти Николас Мадуро ва унинг рафиқаси Силия Флореснинг тириклигини тасдиқлашни талаб қилди ҳамда уларнинг тақдири учун Америка маъмуриятини жавобгар деб атади. 

АҚШнинг Венесуэлага ҳужуми

Эслатиб ўтамиз, 3 январь куни Венесуэла пойтахти Каракас шаҳрида камида еттита портлаш содир бўлди. Портлаш товушлари шаҳарнинг турли ҳудудларида, шунингдек Симон Боливар номидаги Майкетия аэропорти ва Ла-Гуайра порти атрофида ҳам эшитилган.

Кейинроқ Колумбия Президенти Густаво Петро АҚШни Венесуэлани бомбардимон қилишда айблаб, БМТнинг фавқулодда йиғилишини йиғишга чақирди. Шундан сўнг CBS телеканали АҚШ Президенти Дональд Трамп Венесуэла ҳудудидаги қатор объектларга, жумладан ҳарбий нишонларга зарба бериш буйруғини берганини маълум қилди.

Венесуэла Президенти Николас Мадуро мамлакатда кенг қамровли мудофаа тизимини зудлик билан ишга тушириш ва миллий кучларни сафарбар этиш бўйича буйруқ берди. Мамлакатда фавқулодда ҳолат режими эълон қилинди.

Кейинчалик Дональд Трамп Венесуэлага қилинган ҳужум бўйича баёнот бериб, Мадуро рафиқаси билан бирга қўлга олингани ва мамлакатдан олиб чиқиб кетилганини маълум қилди.