Ўзбекистоннинг Эфиопиядаги биринчи элчиси тайинланди

Ўзбекистоннинг Эфиопиядаги элчиси (қароргоҳи Доҳа шаҳрида) Ашраф Хўжаев Эфиопия Федератив Демократик Республикаси Президенти Тайе Ацке-Селассие Амдега ишонч ёрлиқларини топширди. Бу ҳақда “Дунё” ахборот агентлиги хабар берди.

Қайд этилишича, маросим доирасида бўлиб ўтган мулоқот чоғида Ўзбекистон ва Эфиопия ўртасидаги ҳамкорликни ривожлантириш истиқболлари юзасидан фикр алмашилган. Эфиопия Президенти Ўзбекистоннинг мамлакатдаги элчиси тайинланганини мамнуният билан қарши олган. У икки томонлама муносабатларнинг изчил ривожланиши ва амалий ҳамкорликнинг янада кенгайишига ишонч билдирган.

Ўзбекистон элчиси ўз нутқида Президент Шавкат Мирзиёевнинг энг эзгу тилаклари ва самимий саломини етказган ҳамда ўзаро манфаатли иқтисодий ҳамкорликни кенгайтиришга тайёр эканини таъкидлаган.

Эфиопия етакчиси Ўзбекистон Президентига икки давлат ўртасидаги ҳамкорликни йўлга қўяётгани учун миннатдорлик билдирган ва ўзининг эзгу тилакларини йўллаган.

Маълумот учун, Ашраф Хўжаев 2024 йил февралидан буён Ўзбекистоннинг Қатардаги элчиси ҳисобланади. У 2025 йил октябридан эътиборан ўриндошлик асосида Ўзбекистоннинг Жанубий Африка Республикасидаги элчиси сифатида ҳам аккредитациядан ўтган.

Ўзбекистон ва Эфиопия ўртасида дипломатик муносабатлар 1996 йил 15 июлда ўрнатилган. Эфиопия Шарқий Африкада жойлашган қадимий давлат. Пойтахти ва энг йирик шаҳри – Аддис-Абеба. У тарихан мустамлака бўлмаган кам сонли Африка давлатларидан бири ҳисобланади.Ҳудуди: 1,1 миллион км квадратдан ортиқ. Аҳолиси: 115 миллион кишидан зиёд.

Эслатиб ўтамиз, аввалроқ Ўзбекистоннинг Жазоирдаги биринчи элчиси (қароргоҳи Қоҳира шаҳрида) Мансурбек Қиличев Жазоир Ташқи ишлар, хориждаги ватандошлар ва Африка ишлари вазири Аҳмад Аттафга ишонч ёрлиқлари нусхаларини топширганди.