Эфиопиялик 20 нафар футболчи Швецияда бедарак йўқолди

Эфиопия ёшлар футбол жамоасининг қарийб 20 нафар аъзоси Швециянинг Гётеборг шаҳрида бўлиб ўтган халқаро турнирида иштирок этганидан сўнг бедарак йўқолди. Бу ҳақда Швеция полициясига таяниб, SVT хабар берди.

Маълум қилинишича, гуруҳ 14 ёшдан 17 ёшгача бўлган футболчилар ҳамда бир ёки бир нечта катта ёшли ҳамроҳлардан иборат бўлган. Турнирнинг сўнгги куни – жорий йил 18 июлда жамоа жойлашган академия раҳбарияти уларнинг огоҳлантирмасдан кетиб қолганини аниқлаган.

Шундан сўнг, турнир ташкилотчилари полицияга мурожаат қилган. Текширувлар давомида жамоа аъзолари Эфиопияга қайтмагани маълум бўлган. Ҳозирча уларнинг қаерда экани номаълум бўлиб қолмоқда. Қидирув ишлари Швециядан ташқарида ҳам давом эттирилмоқда.

Аввалроқ, ватанига қайтган жамоа вакилларидан бири ташкилотчиларга йўқолган футболчилар оилалари билан алоқада экани ва уларнинг аҳволи яхши эканини билдирган.

“Бу ҳолат ортида одам савдоси ёки шунга ўхшаш бошқа жиноят турганини кўрсатувчи ҳеч қандай аломат йўқ”, дейди Швеция полицияси вакили Эллинор Халльдин.

Терговчиларнинг фикрича, гуруҳ ихтиёрий равишда йўқолган бўлиши мумкин. Шу билан бирга, полиция уларнинг ноқонуний миграция мақсадида Швецияда қолиб кетгани ҳақидаги тахминларни ҳозирча тасдиқламаган.

Маълумот учун, ушбу халқаро турнир жорий йилнинг 12-18 июль кунлари Гётеборг шаҳрида бўлиб ўтди. Мусобақада 78 мамлакатдан 1956 та жамоа иштирок этган.

Эслатиб ўтамиз, аввалроқ марафон бўйича Жанубий Америка рекордчиси, бразилиялик Даниэл Феррейра Бразилиянинг Сан-Паулу штатида бедарак йўқолган эди.