Урганчда 10 млрд сўмдан ортиқ кредит маблағлари талон-торож қилинди

Урганчда масъулияти чекланган жамияти раҳбарлари ва яна бир неча шахслар ҳудудий тижорат банки филиалидан ажратилган кредит маблағларини талон-торож қилгани аниқланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти маълум қилди.

Қайд этилишича, “Б.М." МЧЖ раҳбари Б.Ж. ва бошқа шахслар тижорат банки филиалидан ажратилган кредит эвазига харид қилинган тиббиёт ускуналарини бошқа шахсларга сотиб юборган. Улар жами 5,8 млрд сўм кредит маблағини ўзлаштириш йўли билан талон-торож қилгани аниқланган.

Шунингдек, “К.Ҳ.” МЧЖ раҳбари А.С. ҳудудий тижорат банки филиалидан кўп қаватли уй-жой қуриш учун ажратилган 4,5 млрд сўм кредит эвазига гаровга қўйилган 3 та хонадон ҳамда маиший хизмат кўрсатиш шохобчасини бошқа шахсларга сотиб юборган. У кредит маблағини фирибгарлик йўли билан қўлга киритгани аниқланган.

Мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва  168-моддаси (фирибгарлик) билан жиноят ишлари қўзғатилиб, тергов ҳаракатлари ўтказилмоқда.

Эслатиб ўтамиз, Самарқанд ва Наманган вилоятида 3 млрд сўмга яқин имтиёзли кредит маблағларини ўзлаштирган корхона раҳбарлари аниқлангани ҳақида хабар берган эдик.