Намойишчилар “Марсель” клубининг расмий дўконини талон-торож қилди

Франциянинг Марсель шаҳрида талончилар “Олимпик Марсель” футбол клубининг расмий дўконига бостириб кириб, уни талон-торож қилди. Ҳодиса оқибатида дўкон вақтинча ёпилди. Бу ҳақда клуб матбуот хизмати хабар берди.

Клуб ўзининг расмий дўконига нисбатан содир этилган зўравонлик ва талончилик ҳаракатларини кескин қоралаган.

“Ушбу воқеалар жиддий моддий зарар етказди ва дўконни вақтинча ёпишга мажбур қилди. Бироқ мухлислар шаҳардаги бошқа расмий “Марсель” дўконларига ташриф буюришлари мумкин”, дейилади клуб баёнотида.

Ижтимоий тармоқларда тарқалган видеоларда талончилар дўкон ойнасини синдириб, бино ичига бостириб кираётгани акс этган.

Маълумот учун, жорий йилнинг 17 октябрь куни Париж ва Франциянинг бошқа ҳудудларида ёнилғи нархларининг ошиши ҳамда аҳолининг харид қобилияти пасайишига қарши оммавий намойишлар бўлиб ўтган.

Ташкилотчилар намойишларда 800 минг киши қатнашганини билдирган бўлса, Франция Ички ишлар вазирлиги иштирокчилар сонини 550 минг нафар деб баҳолаган.

Бир қатор шаҳарларда намойишлар тартибсизликлар ва полиция билан тўқнашувларга айланган. Франция ички ишлар вазири Лоран Нуньес мамлакат бўйлаб 2 мингдан ортиқ киши ҳибсга олинганини маълум қилган. Расмийлар тартибсизликлар ва талончиликка алоқадор шахсларни жавобгарликка тортиш давом этишини билдирган.

Эслатиб ўтамиз, аввалроқ мамлакат Президенти Эммануель Макрон тартибсизликлар муносабати билан халққа мурожаат қилгани ҳақида хабар берилган эди.