Украина ва Россия қўшинларни олиб чиқишни муҳокама қилмоқда

Бугун, 15 март куни бўлиб ўтган Россия ва Украина делегациялари музокараларида келишув ва ўт очишни тўхтатишнинг умумий масалалар муҳокама қилинмоқда. Бу ҳақда Украина Президенти девони раҳбари маслаҳатчиси Михаил Подоляк маълум қилди. 

"Музокаралар давом этмоқда. Асосий музокаралар майдончаси бўйича маслаҳатлашувлар қайта тикланди. Музокаралар ўтказишнинг асосий масалалари, ўт очишни тўхтатиш ва мамлакатимиз ҳудудидан қўшинларни олиб чиқиш муҳокама қилинмоқда”, деб ёзди у ўзининг Telegram-каналида. 

Кеча, 14 март куни онлайн форматда Россия ва Украина делегациялари ўртасидаги мунтазам музокаралар бошланди. Кейинроқ томонлар танаффусга чиққани маълум бўлди. 15 март куни “Украинская правда” нашри Киев делегацияси аъзоси, Рада депутати Давид Арахамияга таяниб, музокаралар қайта бошлангани ҳақида хабар берди. 

Россия ва Украина делегациялари ўртасидаги музокараларнинг биринчи раунди 28 февраль куни Беларуснинг Гомел вилоятида бўлиб ўтганди. Иккинчиси 3 март куни Беловежская Пушада, учинчиси 7 март куни Брест вилоятида бўлиб ўтди.  10 март куни Туркиянинг Анталия шаҳрида бўлиб ўтган дипломатик форум доирасида Россия ва Украина Ташқи ишлар вазирлари Сергей Лавров ва Дмитрий Кулеба Туркия Ташқи ишлар вазири Мавлуд Чавушўғли гувоҳлигида мулоқот қилди. 

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.