Украина қишда ҳимояланиш учун АҚШдан аввал берилмаган қуролларни сўраяпти – “Politico”

Олам

image

Россиянинг муҳим инфратузилмага зарбалари кучайиши таҳдиди туфайли Киев Қўшма Штатлардан қўшимча ҳаво мудофаа тизимларини талаб қилди. Бу ҳақда “Politico” ёзмоқда.

Зеленскийнинг фикрича, жанг майдонидаги ҳарбий мағлубиятлар Путинни қишда тинч аҳоли манзилларига зарба беришни кучайтиришга ундайди.

“Украина Россиянинг аксарият ҳужумларининг олдини олишга муваффақ бўлди, бироқ биз келгуси ҳафталарда Россиянинг Украинанинг муҳим инфратузилмасига ракета зарбаларини кўпайтиришини кутишимиз мумкин”, дейди НАТО собиқ раҳбари Андерс Фог Расмуссен баёнотида.

Расмуссеннинг таъкидлашича, Украинага нисбатан тез ва кўп миқдорда олиб келиниши мумкин бўлган нарсалардан бири Германияда ишлаб чиқарилган “Леопард” танкларидир, аммо Берлин бошқа йирик давлатлар томонидан ўрнига ўрин оғир қурол-аслаҳалар берилмагани сабабли уларни етказиб беришдан ҳалигача бош тортмоқда.

Журналистларнинг қайд этишича, ноябргача Украина дронлар, ракеталар ва вертолётларни уриб тушира оладиган иккита Raytheon ҳаво мудофаа тизимини олиши керак. Бундан ташқари, Киев NASAMS юборилишини кутмоқда. Аммо Украина расмийлари бу етарли бўлмайди, деб қўрқишяпти.

Аввалроқ АҚШ Украинага навбатдаги ҳарбий ёрдам пакети доирасида умумий қиймати 625 млн доллар бўлган HIMARS, артиллерия тизимлари, ўқ-дорилар ва зирҳли транспорт воситалари етказиб бериши ҳақида хабар берган эдик.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. 


Мақола муаллифи

Теглар

Россия-Украина уруши Украинага босқин

Баҳолаганлар

19

Рейтинг

3

Мақолага баҳо беринг

Дўстларингиз билан улашинг