Туркияда юз минглаб одамлар норозилик намойишларига чиқди (видео)

Кеча, 21 март куни Туркиянинг Истанбул, Анқара ва Измир каби катта шаҳарларидаги кўчаларга юз минглаб одамлар йиғилиб, сўнгги ўн йилликдаги энг йирик норозилик намойишларини ўтказди. Бу ҳақда NTV хабар берди.

Туркияда намойишлар тақиқланган бўлса-да, Истанбул шаҳри ҳокими Экрем Имомўғли ҳибсга олинганидан буён уч кун давомида норозиликлар кучайиб бормоқда. Бу ҳодиса 2027 йилда ўтказилиши кутилаётган президентлик сайловлари олдидан содир бўлмоқда. Ўша сайловларда Имомўғли мухолифатдаги Жумҳурият халқ партияси номзоди сифатида мамлакат Президенти Ражаб Тойиб Эрдўғанга кучли рақиб бўлиши мумкин.

Эрдўған намойишлар фонида ҳукумат “вандализм” ва “кўча террори” олдида таслим бўлмаслигини таъкидлаган ва “жамоат тартибини бузишга йўл қўйилмаслигини” айтган.

Истанбул ҳокимлиги биноси олдида йиғилган намойишчиларга Жумҳурият халқ партияси етакчиси Ўзғур Ўзел мурожаат қилган.

“Бу партия митинги эмас. Бу ерда барча сиёсий кучлардан одамлар бор. Улар Имомўғли билан бирдамлик билдириш ва демократияни ҳимоя қилиш учун йиғилишди”, деган у.

Ўзел Эрдўғанни “адлияни сиёсий қурол сифатида ишлатаётганликда” айблаб, “биз бунга йўл қўймаймиз” деб таъкидлаган. Унинг сўзларига кўра, Эрдўған намойишлардан қўрқмоқда.

Тўқнашувлар Анқара ва Измирда ҳам кузатилмоқда. Полиция намойишчиларга қарши сув пуркагичлар ва кўзни ёшлантирувчи газ ишлатган.

Измир шаҳрида намойиш ва марш юриши тақиқланганига қарамай, норозиликлар давом этмоқда. Полиция махсус машиналар билан сув пуркаб ва кўздан ёш чиқарувчи газ ишлатиб, намойишчиларга қарши чоралар кўрган.

Истанбулда намойишчилар Сарачхане ҳудудидаги шаҳар ҳокимлиги биноси олдида йиғилган. Уларни тарқатиш учун вақти-вақти билан кўздан ёш чиқарувчи газ ишлатилган. Баъзилар шаҳар ҳокимлиги биносига киришга ҳаракат қилган, бироқ хавфсизлик ходимлари бунга йўл қўймаган. Шундан сўнг, намойишчилар бинонинг ойналарини синдирган.

Анқарада намойишчилар Ўрта Шарқ техник университети олдида тўпланган. Улар баннерлар кўтариб, шиорлар айтиб, полицияга қаршилик кўрсатган. Баъзи намойишчилар полицияга ёнувчи моддалар улоқтирган. Бир гуруҳ одамлар эса Эскишаҳар йўлини тўсган, оқибатда Қизилой томонга ҳаракат қисқа вақтга тўхтаб қолган. Баъзи автомобиллар ҳаракатни давом эттириш учун қарама-қарши йўналишга чиққан. Турли жойларда полицияга тўқмоқ ва тошлар улоқтирилган, оқибатда уч нафар полиция ходими жароҳат олган.

Анталия шаҳрида ҳам Имомўғли ҳибсга олиниши ортидан намойишчилар ва полиция ўртасида кескинлик юзага келган. Кечки соатларда Акдениз университети кампусида йиғилган талабалар ташқарига чиқиб, юриш ўтказмоқчи бўлган. Бироқ кампусдан чиққан намойишчилар ва университет дарвозаси олдида тўпланган гуруҳга полиция махсус машина билан сув пуркаб, вазиятга аралашган. Тўқнашув вақтида 30 га яқин киши ҳибсга олинган.

Туркия Ички ишлар вазири Али Ерлиқоя Х ижтимоий тармоғида 97 нафар намойишчи ва интернетда зўравонликка даъват қилганликда гумон қилинган 54 кишининг ҳибсга олинганини эълон қилди. Тўқнашувларда 16 полициячи жароҳатланган.

“Бизнинг полициямиз кечаю кундуз мамлакатимизда тинчликни ҳимоя қилмоқда”, деди вазир.

Эслатиб ўтамиз, кеча, 21 март куни “Жумҳурият халқ” партияси етакчиси Ўзғур Ўзел бутун Туркия аҳолисини ифторликдан сўнг, кўчага чиқишга ва намойишлар ўтказишга чақирганди. Эрдўған  эса давлат “кўча террорига” таслим бўлмаслигини таъкидлаган ва Туркиянинг “кўчадан топиб олинмаганини” айтганди.

Экрем Имомўғлининг ҳибсга олиниши

19 март куни тонгда Истанбул ҳокими ва Туркия Президенти Ражаб Тойиб Эрдўғаннинг асосий сиёсий рақиби Экрем Имомўғли ҳамда унинг 106 тарафдори ҳибсга олинганди. Улар Курд ҳарбий-сиёсий ташкилоти ПККга кўмаклашиш ҳамда бошқа ноқонуний ҳаракатларда айбланмоқда.

Мазкур воқеалар юзасидан Туркия Адлия вазири Йилмаз Тунч тегишли баёнотини эълон қилди. Унинг маълум қилишича, Истанбул Бош прокуратураси томонидан олиб борилаётган тергов ҳаракатлари доирасида 106 нафар гумонланувчига, жумладан, Истанбул шаҳар ҳокимига нисбатан бугун эрталаб ҳибсга олиш тўғрисида қарорлар чиқарилган. Билдирилишича, Истанбул Бош прокуратураси томонидан 2 та тергов ҳаракатлари олиб борилмоқда. Шунингдек, Истанбул Бош прокуратурасининг баёнотидан маълум бўлишича, тергов материаллари орасида MASAK (Молиявий жиноятларни тергов қилиш бошқармаси) ҳисоботлари, солиқ экспертизаси хулосалари, депозитлар ҳақида ҳисоботлар, гувоҳларнинг баёнотлари ва бошқа далиллар мавжуд.

Туркия Президенти девони Коммуникациялар бошқармаси раҳбари Фахриддин Алтун эса Экрем Имомўғли ҳибсга олингани ортидан давлат раҳбарига нисбатан туҳмат ва бўҳтонлар айтилаётганини билдирди. У суд органларининг мустақиллигига путур етказиш, шунингдек, Президент Ражаб Тойиб Эрдўғанга дахл қилиш, мафкуравий туҳмат ҳаракатларига қарши эканини маълум қилган.

Истанбул шаҳри талабалари Имомўғлининг ҳибсга олинишига қарши намойишга чиқди. Туркиянинг асосий мухолифатдаги Жумҳурият халқ партияси (ЖХП) етакчиси Ўзғур Ўзел 86 миллионлик республика аҳолисини келаси якшанба, 23 март куни Истанбул ҳокими Экрем Имомўғлининг ҳибсга олинишига қарши кўчаларга чиқишга чақирди. ЖХП аъзолари ўзларининг партиядошларининг ҳибсга олинишига норозилик сифатида минбарга тўпланиб, парламент Бош ассамблеяси ишини тўсиб қўйишди.