Туркия телеканалларига митинглардан жонли эфир узатиш тақиқланди

Туркияда лавозимидан четлатилган Истанбул ҳокими Экрем Имомўғлининг ҳибсга олиниши ортидан ўтказилаётган митингларни телеканалларда эфирга узатиш тақиқланди. Бу ҳақда Туркия Радио ва телевидение олий кенгаши раҳбари Абубакир Шаҳин огоҳлантириш билан чиқди.

Абубакир Шаҳин телерадиокомпаниялардан норозилик намойишларини жонли эфирда узатишни тўхтатишни талаб қилган ва бунга риоя қилинмаса, лицензиялар бекор қилиниши билан таҳдид қилган. Шаҳиннинг таъкидлашича, намойишлар ёритилиши “чекланган” ва “холис” бўлиши керак, шунингдек, у расмий маълумотлар ва ҳукумат вакилларининг тушунтиришларини ўз ичига олиши шарт.

Абубакир Шаҳиннинг огоҳлантиришидан кейин Туркиянинг етакчи телеканаллари митинглар, норозилик намойишлари ва Истанбул Адлия саройидан жонли эфирни тўхтатган. Айнан шу жойда Истанбул ҳокими Экрем Имомўғлига эҳтиёт чораси белгиланганди.

Хусусан, TRT Haber, NTV, CNN Turk каби телеканаллар трансляцияларни тўхтатган. Ҳозиргача содир бўлган воқеалар ҳақида фоторепортажлар билан хабарлар бериш давом этмоқда, шунингдек, экспертларнинг чиқишлари эфирга узатилмоқда. Баъзи телеканаллар, жумладан, хусусий Halk TV норозилик намойишлари ўтаётган жойлардан жонли эфирни давом эттирмоқда.

“Politico” нашрининг ёзишича, Х ижтимоий тармоғи митинглар фонида айрим туркиялик мухолифат фаолларининг аккаунтларини блоклаган. Нашр маълумотларига кўра, айрим профилларга фақат Туркия ҳудудида кириш чекланган, бошқа мамлакатларда эса бундай тақиқ мавжуд эмас.

Эслатиб ўтамиз, Экрем Имомўғли Истанбул Бош прокуратураси томонидан Истанбул шаҳар ҳокимлигига қарши очилган коррупция тергови доирасида ҳибсга олинган эди. Истанбул Бош прокуратураси Имомўғли ва 99 гумонланувчига нисбатан жиноий ташкилот етакчиси бўлиш, жиноий ташкилотга аъзолик, товламачилик, порахўрлик, малакали фирибгарлик, шахсий маълумотларни қонунга хилоф равишда қўлга киритиш ва тендер савдоларини сохталаштириш каби айбловлар билан бошланган тергов ишларини давом эттирмоқда.

Бош прокуратура Имомўғли “қуролли террор ташкилотига ёрдам берганлиги бўйича кучли гумон” борлигини, аммо уни молиявий жиноятлар учун ҳибсга олиш қарори аллақачон чиқарилгани сабабли, унинг яна ҳибсга олиниши “ҳозирги босқичда зарур эмас”лигини билдирди.

Шунингдек, коррупция иши бўйича ҳибсга олинган Экрем Имомўғли вақтинчалик чора сифатида ўз лавозимидан четлатилди. Кейинроқ Туркия мухолифати – Жумҳурият халқ партияси етакчиси Ўзғур Ўзел ҳибсга олинган ва лавозимидан четлатилган Истанбул ҳокими Экрем Имомўғлининг президентликка номзод сифатида илгари сурилиши учун партия праймеризида деярли 15 миллион киши овоз берганини билдирди. Шу тариқа Имомўғли расман Туркия президентлигига номзод бўлди.  

Экрем Имомўғлининг ҳибсга олиниши

19 март куни тонгда Истанбул ҳокими ва Туркия Президенти Ражаб Тойиб Эрдўғаннинг асосий сиёсий рақиби Экрем Имомўғли ҳамда унинг 106 тарафдори ҳибсга олинганди. Улар Курд ҳарбий-сиёсий ташкилоти ПККга кўмаклашиш ҳамда бошқа ноқонуний ҳаракатларда айбланмоқда.

Мазкур воқеалар юзасидан Туркия Адлия вазири Йилмаз Тунч тегишли баёнотини эълон қилди. Унинг маълум қилишича, Истанбул Бош прокуратураси томонидан олиб борилаётган тергов ҳаракатлари доирасида 106 нафар гумонланувчига, жумладан, Истанбул шаҳар ҳокимига нисбатан бугун эрталаб ҳибсга олиш тўғрисида қарорлар чиқарилган. Билдирилишича, Истанбул Бош прокуратураси томонидан 2 та тергов ҳаракатлари олиб борилмоқда. Шунингдек, Истанбул Бош прокуратурасининг баёнотидан маълум бўлишича, тергов материаллари орасида MASAK (Молиявий жиноятларни тергов қилиш бошқармаси) ҳисоботлари, солиқ экспертизаси хулосалари, депозитлар ҳақида ҳисоботлар, гувоҳларнинг баёнотлари ва бошқа далиллар мавжуд.

Туркия Президенти девони Коммуникациялар бошқармаси раҳбари Фахриддин Алтун эса Экрем Имомўғли ҳибсга олингани ортидан давлат раҳбарига нисбатан туҳмат ва бўҳтонлар айтилаётганини билдирди. У суд органларининг мустақиллигига путур етказиш, шунингдек, Президент Ражаб Тойиб Эрдўғанга дахл қилиш, мафкуравий туҳмат ҳаракатларига қарши эканини маълум қилган.

Истанбул шаҳри талабалари Имомўғлининг ҳибсга олинишига қарши намойишга чиқди. Туркиянинг асосий мухолифатдаги Жумҳурият халқ партияси (ЖХП) етакчиси Ўзғур Ўзел 86 миллионлик республика аҳолисини келаси якшанба, 23 март куни Истанбул ҳокими Экрем Имомўғлининг ҳибсга олинишига қарши кўчаларга чиқишга чақирди.  ЖХП аъзолари ўзларининг партиядошларининг ҳибсга олинишига норозилик сифатида минбарга тўпланиб, парламент Бош ассамблеяси ишини тўсиб қўйишди.