Трамп БАА билан 200 млрд долларлик шартнома тузди

АҚШ Президенти Дональд Трамп кеча, 15 май куни АҚШ ва Бирлашган Араб Амирликлари (БАА) ўртасидаги муносабатларни мустаҳкамлашга ваъда берди ва 200 миллиард доллардан ортиқ қийматдаги шартномаларни эълон қилди. Шунингдек, икки мамлакат сунъий интеллект (AI) соҳасида ҳамкорликни чуқурлаштиришга келишиб олди. Бу ҳақда Оқ уй баёнотида сўз боради.

Трамп БАА Президенти Шайх Муҳаммад бин Зоид Ол Наҳаён билан учрашганидан сўнг, Etihad Airways’нинг 14,5 миллиард долларлик инвестициясини ўз ичига олган шартномалар эълон қилинди – бу маблағлар 28 та Boeing 787 ва 777x самолётларига сарфланади, уларнинг двигателлари GE Aerospace томонидан ишлаб чиқарилади.

АҚШ Савдо вазирлиги маълум қилишича, икки мамлакат “АҚШ–БАА Сунъий Интеллектни Жадаллаштириш Ҳамкорлиги” деб номланган янги ҳамкорлик доирасини ташкил қилишга келишган. Шунингдек, Трамп ва Шайх Муҳаммад бин Зоид Ол Наҳаён 5 ГВт қувватга эга янги сунъий интеллект кампуси очилишида иштирок этди — бу АҚШдан ташқаридаги энг йирик AI маркази бўлади.

Манбаларнинг хабар беришича, бундай келишувлар БААга АҚШда ишлаб чиқарилган илғор AI чипларига кенгроқ имкониятлар беради. АҚШ аввалига Хитой технологияларга етиб олиши мумкинлигидан хавотирланиб, чекловлар жорий қилган эди.

Эслатиб ўтамиз, Трамп Бирлашган Араб Амирликлари (БАА) ўн йил ичида АҚШга 1,4 триллион доллар сармоя киритишини айтганди. Шунингдек, Ол Наҳаён Трампга БАА ва АҚШ ўртасидаги дўстлик ва стратегик шерикликни мустаҳкамлашга қаратилган саъй-ҳаракатлари учун “Заед” миллий орденини топширди.

Трампнинг Яқин Шарққа ташрифи

Яқин Шарққа ташриф буюрган Трамп 13-16 май кунлари мазкур минтақада бўлади. АҚШ Президенти ҳозиргача мазкур ташриф давомида Саудия Арабистони билан АҚШ иқтисодиётига 600 млрд доллар сармоя киритиш бўйича битим имзолади. 

Шунингдек, Трамп ва Қатар ҳукумати ўртасида 1,2 триллион доллардан ортиқ қийматга эга иқтисодий ҳамкорлик тўғрисидаги шартнома имзоланди. Мазкур шартнома Boeing компанияси Қатарга 200 млрд долларлик 160 дан ортиқ самолёт етказиб бериши тўғрисидаги келишувни ҳам ўз ичига олади.  

Бундан ташқари, Саудия Арабистонида бўлиб турган пайтда Трамп Сурияга қарши барча АҚШ санкцияларини бекор қилишини эълон қилди. Бу қарор ижтимоий ва дипломатик доираларда катта резонансга сабаб бўлди. Трамп, шунингдек, Сурия муваққат президенти Аҳмад аш-Шара билан учрашди ва уни Исроилни тан олиш ва Иброҳим келишувларига қўшилишга даъват этди.