Ташиев депутатга мандатидан маҳрум қилиш билан таҳдид қилди (видео)

Кеча, 19 март куни Қирғизистонда парламент йиғилишида Миллий хавфсизлик хизмати раҳбари Қамчибек Ташиев ва депутат Султонбой Айжигитов Қирғизистон-Тожикистон чегараси бўйича битим ва Достук қишлоғининг Тожикистонга берилиши бўйича тортишиб қолди. Бу ҳақда “Kloop” хабар берди.

Ташиевнинг айтишича, Айжигитовнинг танқидий баёнотидан сўнг у депутат ҳақида маълумот тўплаган. Унинг таъкидлашича, 2022 йилги қуролли можаро ортидан Айжигитов ҳеч қачон Боткен вилоятига бормаган. Шунингдек, Ташиевнинг сўзларига кўра, депутатнинг ягона тажрибаси атиги олти йил МХХда ишлагани билан чекланади. Ташиев шунингдек, 2017 йилда Айжигитов болани урганини айтди. 

“Сизнинг судларда ишловчи қариндошларингиз “безорилик” моддаси бўйича очилган ишни бошқа модда билан алмаштирди ва муддати ўтиб кетгани учун ишни ёпишди. Шу тариқа сиз жавобгарликдан қочдингиз”, деди Ташиев.

У, шунингдек, депутат парламентга номзодини қўйишдан олдин Марказий сайлов комиссиясига судлангани тўғрисида маълумот тақдим этмаганини айтиб, депутатлар олдида унга мандатдан маҳрум қилиниши эҳтимоли ҳақида огоҳлантирган.

“Чегара бўйича битим ратификация қилингандан дипломатик ноталар алмашилиб, қонун кучга киргандан сўнг, мен Айжигитовнинг анкета маълумотларида фактларни яширгани бўйича МСКга яна бир бор сўров юбораман. Бу – қонун талаби”, деди у.

Ташиев, шунингдек, Айжигитов Достук қишлоғига на Боткен вилояти ҳокими бўлиб ишлаганида, на депутат бўлганида бормаганини таъкидлаган.

Бунга жавобан Айжигитов Ташиев “трибунадан лой чаплаш билан шуғуллангани”ни айтган. У ҳозирги вазиятда Ташиев томонда куч, пул ва ресурслар борлигини таъкидлаб, унда истаган гапни гапиришга имконият борлигини билдирган. Депутат ўзининг судланмаганини таъкидлаб, Ташиевнинг уни болани урганликда айблашини “бўш гаплар” деб атаган.

“Терговчилар менинг айбимни исботлай олмади ва ишни чўзди. Масала долзарблигини йўқотгани ва муддат тугагани сабабли иш ёпилди. Менда ҳеч қандай судланганлик йўқ, у ёпилган. МСК номзодлар ҳақида маълумот сўрайди. Унга, эҳтимол, иш ёпилгани ҳақида жавоб беришган”, деди у.

Айжигитов ўз вақтида Ташиевга нисбатан ҳам жиноят иши очилганини эслатиб ўтган.

north_east

Қўшнининг ҳаққи. Марказий Осиёда ёнган оловни Мирзиёев ўчирдими?

“Масалан, сизга нисбатан ҳам махсус давлат иши очилган, ҳатто Президентга ҳам. Аммо сизлар ҳам ишни ёпдингиз ва судланганликни олиб ташладингиз. Менда ҳам судланганлик дарҳол бекор қилинди. Бировнинг кўзидаги ғуборни кўриб, ўзингизнинг кўзингиздагини сезмаяпсиз”, деб жавоб берган депутат.

Шундан сўнг парламент қўмиталари ва парламентнинг ўзи Қирғизистон-Тожикистон чегараси бўйича битимни ратификация қилган. Айжигитов эса овоз бериш жараёнида битимга қарши чиққан ягона депутат бўлган.

Кейин депутат Ташиевни теледебатларга таклиф қилиб, унинг орқасида бутун давлат машинаси турганини таъкидлаган.

“Сизда қўрқадиган ҳеч нарса йўқ, мен эса ёлғизман, эҳтимол, фақат халқ бор. Чегара масаласи ҳал бўлди, вақт ҳамма нарсани ўз жойига қўяди”, деди у.

Бунга жавобан Ташиев Айжигитовга қарши теледебатларга чиқадиган ташкилот МСК бўлишини айтган.

Маълумот учун, жорий йилнинг 5 март куни депутат Султонбой Айжигитов парламентда сўзга чиқиб, Қирғизистон-Тожикистон чегараси бўйича битим доирасида Достук қишлоғининг Тожикистонга берилишига қарши чиққан. Шунингдек, ҳужжат имзолангач, қўшни давлат Ворух анклавига йўл очиб олишини айтган.

Шундан сўнг, “Ийман Нуру” фракцияси раҳбари Динара Ашимова Айжигитов ўз баёнотини ҳамкасблари билан муҳокама қилмаганини билдирган. Натижада уни “Ийман Нуру” фракциясидан чиқариб юборишган.

13 март куни Қирғизистон ва Тожикистон Президентлари чегара бўйича делимитация ва демаркация тўғрисидаги битимни имзолади.

Кейин, 19 март куни парламент йиғилишида Айжигитов Ашимовани прокуратурага бериш билан таҳдид қилди. У ҳамкасбининг уни фракциядан чиқариш қарорини “депутатлик позициясини мустақил ифодалагани учун ваколатдан ошиб кетиш” деб атади.