Собиқ шаҳзода Эндрю ҳибсга олинганидан кейин илк бор кўриниш берди

Марҳум молиячи Жеффри Эпштейн билан алоқалари сабабли ҳибсга олинган собиқ шаҳзода Эндрю илк бор омма олдида кўриниш берди. Бу ҳақдаги фотосуратлар “Page Six” сайтида эълон қилинди.

Папараццилар жорий йилнинг 21 март куни Буюк Британия қироли Чарьлз III нинг укасини Норфолкдаги Сандрингем мулкида суратга олган. У тансоқчиси ҳамроҳлигида итларини сайр қилдираётган бўлган.

Эндрю қора рангли кийимда бўлиб, юзини “капюшон” билан тўсиб олган. Шу тариқа, Буюк Британия қиролининг укаси жамоатчилик эътиборини ўзига қаратмасликка ҳаракат қилган.

“Radar” нашрининг хабар беришича, Эндрюнинг Эпштейн билан алоқаси ҳалигача баҳс-мунозараларга сабаб бўлмоқда. Эндрюнинг эҳтимолий қурбони бўлган Виржиния Жуффренинг мемуарлари (хотиралари) нашр этилиши, шунингдек, машҳур педофил молиячининг ишига оид жуда кўп миқдордаги материаллар эълон қилинганидан сўнг, уларнинг мулоқотига бўлган қизиқиш яна ортди.

Эслатиб ўтамиз, 19 февраль куни Британия полицияси Эндрю Маунтбеттен-Виндзорни америкалик молиячи Жеффри Эпштейн билан боғлиқ можаро фонида ҳибсга олган эди. Собиқ шаҳзода ўз туғилган кунида давлат хизматидаги номақбул хатти-ҳаракатларда гумонланиб қўлга олинган.