Эпштейн аёллар савдоси бўйича халқаро тармоқ тузган – ОАВ

north_east

SEX TRAFFICKING ёхуд Ўзбекистонлик қиз ортидан “Гуноҳлар ороли”га йўл

Марҳум молиячи Жеффри Эпштейн 2009 йилда қамоқдан озод этилганидан сўнг аёлларни жинсий эксплуатация қилишни тўхтатмаган, аксинча уларни ёллаш ва ташиш бўйича халқаро тармоқ ташкил этган. АҚШ Адлия вазирлиги ҳужжатларини, жумладан ёзишмалар, Skype хабарлари ва авиабилетларни банд қилиш ёзувларини таҳлил қилган “Bloomberg” журналистлари шундай хулосага келди.

Нашр ҳисоб-китобларига кўра, 2009 йилдан 2019 йилгача бўлган даврда Эпштейннинг ходимлари 3700 дан ортиқ тижорий авиапарвозларни банд қилган. Йўналишларнинг салмоқли қисми Шарқий Европа шаҳарларини Париж, Нью-Йорк ва АҚШнинг Виржиния оролларидаги Литл-Сент-Жеймс ороли – тергов маълумотларига кўра, аёлларга нисбатан жинсий зўравонлик содир этилган жойлар билан боғлаган. Ёзувларнинг деярли ярмида йўловчиларнинг исм-шарифлари йўқ, чунки АҚШ Адлия вазирлиги эҳтимолий жабрланувчиларнинг шахсини яширган.

Журналистларнинг билдиришича, озодликка чиққанидан сўнг Эпштейн Россия, Украина, Польша, Болтиқбўйи мамлакатлари, Бразилия ва бошқа давлатларда модель индустриясида иш таклиф қилиш ниқоби остида ёш аёлларни қидирадиган скаутлар ва воситачиларнинг кенг тармоқланган тизимини яратган. “Bloomberg” томонидан сўров ўтказилган одам савдосига қарши курашиш бўйича экспертлар аниқланган бу схема халқаро уюшган жиноий тармоқ белгиларига мос келади деб ҳисоблайди.

Журналистик суриштирув, шунингдек, модель бизнеси одамларни ёллаш учун ниқоб сифатида фойдаланилганини кўрсатади. Чоп этилган ёзишмаларда скаутлар қизларни қидиришни муҳокама қилган, кастинглар, фотографлар билан ишлаш ёки санъат асарлари коллекционери билан танишиш баҳонасида Эпштейн билан учрашувлар ташкил этишни таклиф қилган, шунингдек, ёш моделлардан доимий фойдаланиш имкониятига эга бўлиш усули сифатида модель агентликлари, журналлар ва гўзаллик танловларини сотиб олиш имкониятини кўриб чиққан.

Суриштирувнинг алоҳида қисми логистикага бағишланган. “Bloomberg” Эпштейн ходимлари парвозларни банд қилиш учун American Express’нинг премиум сервисидан фойдалангани аён бўладиган ёзишмаларни аниқлаган. Хатлардан бирида сервис вакили, гарчи бундай амалиёт компаниянинг ички қоидаларига зид бўлса-да, виза олишга ёрдам бериш учун фойдаланилмаслиги керак бўлган сохта йўналишни расмийлаштиришга рози бўлган. American Express журналистларга Эпштейнга федерал айбловлар қўйилганидан кейин унинг ҳисоб рақамларини ёпганини ва одам савдосини қоралашини маълум қилган.

“Bloomberg” маълумотларига кўра, одам ташиш 2019 йилнинг ёзида Эпштейн ҳибсга олингунига қадар давом этган. У қўлга олинишидан олдинги сўнгги ҳафталарда Парижга Киев, Москва, Варшава, Лондон ва бошқа шаҳарлардан аёллар борган. Эпштейннинг ўзи бу вақтда дипломатлар, бизнесменлар ва олимлар билан учрашган. 2019 йил 6 июлда АҚШга қайтиб боргач, у ФҚБ томонидан қўлга олинган.

“Bloomberg”нинг ёзишича, Адлия вазирлиги томонидан чоп этилган ҳужжатлар Эпштейн ходимлари томонидан парвозлари банд қилинган ҳар бир аёлнинг кейинги тақдирини аниқлаш имконини бермайди. Бироқ журналистлар йўналишларнинг бир қисмини маълум жабрланувчилар билан мослаштира олган. Экспертлар эса аниқланган ташиш ва ёллаш схемаларини уюшган одам савдоси учун хос деб ҳисобламоқда.

Эслатиб ўтамиз, аввалроқ Жеффри Эпштейн учун ёш аёлларни топиб берганликда гумон қилинган моделлар агенти Даниел Сиад Франциядаги уйида ўлик ҳолда топилганди.