Epshteyn ayollar savdosi bo‘yicha xalqaro tarmoq tuzgan – OAV

north_east

SEX TRAFFICKING yoxud O‘zbekistonlik qiz ortidan “Gunohlar oroli”ga yo‘l

Marhum moliyachi Jeffri Epshteyn 2009 yilda qamoqdan ozod etilganidan so‘ng ayollarni jinsiy ekspluatatsiya qilishni to‘xtatmagan, aksincha ularni yollash va tashish bo‘yicha xalqaro tarmoq tashkil etgan. AQSH Adliya vazirligi hujjatlarini, jumladan yozishmalar, Skype xabarlari va aviabiletlarni band qilish yozuvlarini tahlil qilgan “Bloomberg” jurnalistlari shunday xulosaga keldi.

Nashr hisob-kitoblariga ko‘ra, 2009 yildan 2019 yilgacha bo‘lgan davrda Epshteynning xodimlari 3700 dan ortiq tijoriy aviaparvozlarni band qilgan. Yo‘nalishlarning salmoqli qismi Sharqiy Yevropa shaharlarini Parij, Nyu-York va AQSHning Virjiniya orollaridagi Litl-Sent-Jeyms oroli – tergov ma’lumotlariga ko‘ra, ayollarga nisbatan jinsiy zo‘ravonlik sodir etilgan joylar bilan bog‘lagan. Yozuvlarning deyarli yarmida yo‘lovchilarning ism-shariflari yo‘q, chunki AQSH Adliya vazirligi ehtimoliy jabrlanuvchilarning shaxsini yashirgan.

Jurnalistlarning bildirishicha, ozodlikka chiqqanidan so‘ng Epshteyn Rossiya, Ukraina, Polsha, Boltiqbo‘yi mamlakatlari, Braziliya va boshqa davlatlarda model industriyasida ish taklif qilish niqobi ostida yosh ayollarni qidiradigan skautlar va vositachilarning keng tarmoqlangan tizimini yaratgan. “Bloomberg” tomonidan so‘rov o‘tkazilgan odam savdosiga qarshi kurashish bo‘yicha ekspertlar aniqlangan bu sxema xalqaro uyushgan jinoiy tarmoq belgilariga mos keladi deb hisoblaydi.

Jurnalistik surishtiruv, shuningdek, model biznesi odamlarni yollash uchun niqob sifatida foydalanilganini ko‘rsatadi. Chop etilgan yozishmalarda skautlar qizlarni qidirishni muhokama qilgan, kastinglar, fotograflar bilan ishlash yoki san’at asarlari kolleksioneri bilan tanishish bahonasida Epshteyn bilan uchrashuvlar tashkil etishni taklif qilgan, shuningdek, yosh modellardan doimiy foydalanish imkoniyatiga ega bo‘lish usuli sifatida model agentliklari, jurnallar va go‘zallik tanlovlarini sotib olish imkoniyatini ko‘rib chiqqan.

Surishtiruvning alohida qismi logistikaga bag‘ishlangan. “Bloomberg” Epshteyn xodimlari parvozlarni band qilish uchun American Express’ning premium servisidan foydalangani ayon bo‘ladigan yozishmalarni aniqlagan. Xatlardan birida servis vakili, garchi bunday amaliyot kompaniyaning ichki qoidalariga zid bo‘lsa-da, viza olishga yordam berish uchun foydalanilmasligi kerak bo‘lgan soxta yo‘nalishni rasmiylashtirishga rozi bo‘lgan. American Express jurnalistlarga Epshteynga federal ayblovlar qo‘yilganidan keyin uning hisob raqamlarini yopganini va odam savdosini qoralashini ma’lum qilgan.

“Bloomberg” ma’lumotlariga ko‘ra, odam tashish 2019 yilning yozida Epshteyn hibsga olinguniga qadar davom etgan. U qo‘lga olinishidan oldingi so‘nggi haftalarda Parijga Kiyev, Moskva, Varshava, London va boshqa shaharlardan ayollar borgan. Epshteynning o‘zi bu vaqtda diplomatlar, biznesmenlar va olimlar bilan uchrashgan. 2019 yil 6 iyulda AQSHga qaytib borgach, u FQB tomonidan qo‘lga olingan.

“Bloomberg”ning yozishicha, Adliya vazirligi tomonidan chop etilgan hujjatlar Epshteyn xodimlari tomonidan parvozlari band qilingan har bir ayolning keyingi taqdirini aniqlash imkonini bermaydi. Biroq jurnalistlar yo‘nalishlarning bir qismini ma’lum jabrlanuvchilar bilan moslashtira olgan. Ekspertlar esa aniqlangan tashish va yollash sxemalarini uyushgan odam savdosi uchun xos deb hisoblamoqda.

Eslatib o‘tamiz, avvalroq Jeffri Epshteyn uchun yosh ayollarni topib berganlikda gumon qilingan modellar agenti Daniyel Siad Fransiyadagi uyida o‘lik holda topilgandi.