Шойгу яна алдаяптими? Украина урушда нималарни йўқотди? 

Россия Мудофаа вазири Сергей Шойгу жорий йилнинг 4 июнь кунидан бери Украина Қуролли Кучларининг фронтдаги йўқотишлари ҳақида маълумот берди. Унинг айтишича, Украина учун Польша ва Португалия томонидан етказиб берилган ҳамма Leopard танклари йўқ қилинган. 

Шойгунинг даъво қилишича, Украина қўшинлари сўнгги бир ойнинг ичида 2,5 мингга яқин турли қуролларини йўқотган. Бу даврда Россия Қуролли Кучлари Жанубий Донецк, Запарожье ва Донецк йўналишларида 15 та самолёт, 3 та вертолёт ва 920 та зирҳли техникани йўқ қилгани таъкидланган. 

Шунингдек, россиялик ҳарбийлар томонидан 158 та HIMARS ракетаси, 25 та Storm Shadow қанотли ракетаси ва 386 та дрон уриб туширилгани айтилган. 

Вазирнинг таъкидлашича, Украина Қуролли Кучларига Португалия ва Польша томонидан етказиб берилган барча Leopard танклари (16 та) йўқ қилинган. 

Айтиш жоизки, кўп ҳолларда Россия Мудофаа вазирлиги тақдим этадиган статистикалар Украина томониникидан фарқ қилади. 

Маълумот учун, ҳозирги вақтга қадар еттита ғарб давлати (Германия, Швеция, Польша, Испания, Нидерландия, Португалия ва Канада) томонидан 60 га яқин Leopard танклари Украинага юборилган. Бундан 18 та танк Германия томонидан таъминланган. 

Эслатиб ўтамиз, аввалроқ Германия шу йил якунига қадар Украинага юбориладиган Leopard танклари миқдорини ошириши ва уларнинг умумий сони 100 дан ортишини маълум қилганди. Киев эса ундан етказиб бериладиган танклар миқдорини уч бараварга оширишни сўраганди. 

Июнь ойи ўрталарида эса Россия Қуролли Кучлари ҳарбийсига Leopard танкини йўқ қилгани учун миллион рубль мукофот берилганди. Олдинроқ Россия ҳарбийлари йўқ қилдик деб ўйлаган Leopard танки аслида комбайн бўлиб чиққани хабар қилинган. 

Шунингдек, яқинда “Вагнер” асосчиси Евгений Пригожин мамлакат Мудофаа вазири Сергей Шойгуни ҳар куни йўқ қилинаётган 60 талаб Leopard танклари ва уч мингга яқин душман аскарлари ҳақидаги ёлғон ҳисоботлар билан Путин ва бутун Россия жамоатчилигини алдаётганликда айблаганди.