Kiyev Germaniyadan yetkazib berilgan Leopard tanklari sonini uch baravar oshirishni so‘ramoqda

Ukraina Germaniyadan mamlakatga ko‘proq tank yetkazib berishni so‘ramoqda. Bu haqda Ukraina Tashqi ishlar vaziri o‘rinbosari Andrey Melnik “Der Tagesspiegel” nashriga bergan intervyusida aytib o‘tgan.

“Ukraina armiyasiga birinchi navbatda G‘arb tanklari, piyodalar jangovar mashinalari va boshqa zirhli texnikalar kerak”, deydi Andrey Melnik.

Uning so‘zlariga ko‘ra, janglarda berilgan qurollarning bir qismi yo‘qolgani sababli, har bir Leopard 2 Ukraina Qurolli Kuchlarining hal qiluvchi hujumi uchun oltinga tengdir.

Melnikning ta’kidlashicha, Germaniya Kiyevga 300 dan ortiq tank zaxirasidan yetkazib berilgan 18 ta tankdan ko‘ra ko‘proq ushbu texnikani o‘tkazish imkoniyatiga ega va hozirgi sonni Germaniya mudofaa qobiliyatini xavf ostiga qo‘ymasdan uch baravar oshirish mumkin.

Shu bilan birga Andrey Melnik Germaniyadan yana 60 ta Marder piyoda jangovar mashinasini, shuningdek, Taurus qanotli raketalarini Ukraina Qurolli kuchlariga topshirishni va Kiyevga kuchli havo kuchlarini yaratishda yordam berishni so‘ragan.

“Ukraina Germaniyaning qiruvchi samolyotlarni yetkazib berish bo‘yicha koalitsiyada faol ishtirok etish, ukrainalik uchuvchilarga Eurofighter qiruvchi samolyotlarida mashq qilish imkoniyatini zudlik bilan ta’minlash va 130 dan ortiq samolyotning bir qismini taqdim etish bo‘yicha strategik qarorini kutmoqda”, deya qo‘shimcha qilgan Melnik.