Ширинлик фожиаси: ўзбекистонлик келин ўғирлаб кетилгани маълум бўлди

Қозоғистонда эри билан ширинлик сабаб келиб чиққан можаро ортидан вафот этган Мадина Авезованинг онаси қизининг оилавий ҳаёти ҳақида гапирди. Бу ҳақда “Qumash.kz” хабар берди.

Қайд этилишича, марҳуманинг онаси адвокат Инга Иманбай билан бирга блогер Жан Ахмадиевга интервью берган. Онанинг сўзларига кўра, Мадияр қизи Мадинани 17 ёшида уйидан ўғирлаб кетган. Ўша пайтда қиз ҳомиладор бўлган.

“Қизим севиб қолгани учун турмушга чиққан”, деган Мадинанинг онаси.

Унинг айтишича, ҳозир энг катта афсуси қизини ўша пайтда уйига қайтариб олмагани. Шунингдек, аёл Мадинанинг ўз жонига қасд қилганига ишонмаётганини билдирган.

Онасининг сўзларига кўра, қизининг танасида кўкариш ва тирналиш излари бўлган, сочларига эса тупроқ ва сомон ёпишиб қолган. Шу сабабли у полициядан воқеани ҳар томонлама тергов қилишни сўраган.

Шунингдек, аёл қизининг турмуши расмий тўй билан бошланмаганини айтган. Унинг сўзларига кўра, оилалар ўртасида на тўй маросими, на қудалик бўлган, фақат юз очиш маросими ўтказилган, холос.

Бундан ташқари, марҳуманинг онаси ижтимоий тармоқларда тарқалган оиланинг моддий аҳволи ҳақидаги гап-сўзларни рад этган. У Мадияр оиласига мунтазам равишда ёрдам бериб турганини маълум қилган.

Хусусан, Мадиярнинг отаси қамоққа тушганида Мадина онасидан 700 минг тенге сўраган ва аёл бу маблағни қизига берган. Бундан ташқари, Мадина бир неча бор мебель ва маиший техника харид қилиш учун ёрдам сўраган. Туғилган кунида эса онаси қизига музлатгич олиш учун пул берган.

Блогер Жан Ахмадиевнинг айтишича, Мадинанинг яқинлари унинг буюмларини эрининг уйидан олиб кетмоқчи бўлганида, уларга нарсалар берилмаган. Қариндошларига бу буюмлар энди ўша оилага тегишли экани айтилган.

Мадина оиладаги ягона фарзанд бўлган. У жорий йилнинг 18 август куни 19 ёшга тўлиши керак эди.

Эслатиб ўтамиз, аввалроқ Мадина ширинлик сабаб эри билан юз берган можаро ортидан 19 ёшга тўлмасидан вафот этгани ҳақида хабар берилган эди.