Шимолий Корея янги ракеталарни синовдан ўтказди

Шимолий Корея сувости кемаларидан учирилиши мўлжалланган қанотли ракеталарни синовдан ўтказди. Бу ҳақда DW хабар берди.

Қайд этилишича, ракета синови кеча, 14 октябрь куни Корея яриморолининг шарқий соҳилидаги сувларда ўтказилган. Синовдан кўзланган мақсад сувости жанговар тизимларининг тайёрлигини текшириш ва мамлакат Ҳарбий-денгиз кучлари салоҳиятини ошириш бўлган.

Ракеталар ҳақиқий сувости кемасидан ёки сув остидаги синов платформасидан учирилгани аниқ эмас. Шимолий Корея давлат ОАВлари уларни стратегик қурол деб таърифлаган. Бу ракеталар ядровий каллаклар билан жиҳозланиши мумкинлигига ишора қилади, бироқ мақолада бу тасдиқланмаган.

Қайд этиш жоиз, Пхеньян сўнгги ҳафталарда турли қуролларни синовдан ўтказиб, АҚШ ва Жанубий Кореяга қарши ҳарбий тийиб туриш салоҳиятини оширишга интилмоқда. Мамлакат замонавий ракета сувости кемалари, баллистик ва қанотли ракеталарни ишлаб чиқиш ишларини ҳам давом эттирмоқда. Бироқ Шимолий Корея замонавий ракета сувости кемасини тўлиқ иш ҳолатида ишга туширгани ҳозирча маълум эмас.

Сўнгги воқеалар Ким Чен Иннинг мамлакатдаги янги ҳарбий музейга ташрифидан икки кун ўтиб юз берди. Шимолий Корея давлат ОАВлари етакчининг ташрифи акс этган суратларни эълон қилган. Музейда АҚШ ҳудудигача етиб бориши мумкин бўлган қитъалараро баллистик ракета ҳам намойиш этилган.

Ким Чен Ин мамлакат ядровий арсеналини кучайтириш устувор вазифа эканини таъкидлаган. Пхеньян АҚШ илгари сураётган ядровий қуролсизланиш масаласини муҳокама қилишга тайёр эмас.

Шу билан бирга, Ким Чен Ин ва АҚШ Президенти Дональд Трамп ўртасида эҳтимолий учрашув масаласи ҳам кун тартибига чиқди. Трамп президентлик даврининг биринчи муддатида Шимолий Корея етакчиси билан уч марта учрашган. АҚШ раҳбари келаси ой Осиёга сафари чоғида Ким билан учрашиши мумкинлигини билдирган.

Айни пайтда Шимолий Корея ва Жанубий Корея ўртасидаги муносабатлар кескинлигича қолмоқда.

Пхеньян Сеул билан барча мувофиқлаштириш ишларини тўхтатган, шунингдек, мамлакат конституциясидан Корея яриморолини бирлаштиришга оид қоидаларни олиб ташлаган.

Эслатиб ўтамиз, аввалроқ Шимолий Корея Япон денгизи томон баллистик ракета учиргани ҳақида хабар берилган эди.