Санэпидқўмита ходимлари пора билан қўлга тушди

Санитария-эпидемиологик осойишталик ва жамоат саломатлиги тизимида коррупция билан боғлиқ бир қатор ҳолатлар аниқланди. Ҳуқуқни муҳофаза қилувчи органлар томонидан ўтказилган тезкор тадбирлар давомида бир нечта мансабдор шахслар ашёвий далиллар билан ушланган. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.

Қайд этилишича, департаментнинг Сирдарё вилояти бошқармаси томонидан ўтказилган тезкор тадбирда Гулистон шаҳар Санитария-эпидемиологик осойишталик ва жамоат саломатлиги бўлимида шифокор ёрдамчиси М.А. ушланган. У фуқароларга юқори лавозимларда ишловчи танишлари орқали “M.M.” МЧЖ томонидан тайёрланадиган тайёр овқат маҳсулотига ижобий хулоса олиб бериши мумкинлигини айтган ва бунинг эвазига 300 АҚШ доллари ҳамда 1,2 млн сўм олган вақтида қўлга тушган.

Шунингдек, департаментнинг Тойлоқ тумани бўлими ва бошқа ҳуқуқни муҳофаза қилувчи органлар ҳамкорлигида ўтказилган тадбирда Санитария-эпидемиологик осойишталик ва жамоат саломатлиги қўмитасининг Тойлоқ туман бўлими санитар врачи Ф.Б. ҳам ушланган. Маълум бўлишича, у ЯТТ “С.Э.”га тегишли нон маҳсулотлари ишлаб чиқариш цехига санитар-гигиеник хулоса расмийлаштириб бериш учун 9 млн сўм талаб қилган. У келишилган пулдан 400 АҚШ долларини олган вақтида ушланган. Текширувлар давомида мазкур шахс аввалроқ ҳам 100 АҚШ доллари ва 500 минг сўмни фирибгарлик йўли билан олгани аниқланган.

Бундан ташқари, департаментнинг Хоразм вилояти бошқармаси ходимлари томонидан ўтказилган тезкор тадбирда Урганч шаҳар Санитария-эпидемиологик осойишталик ва жамоат саломатлиги бўлими ходими Ғ.А. ушланган. У фуқаро Б.Д.га Урганч шаҳрида умумий овқатланиш шохобчаси очиш учун рухсатнома расмийлаштириб бериш, шунингдек, 6 ой давомида жарима қўлламасликни ваъда қилиб, 2,4 млн сўмни фирибгарлик йўли билан олган.

Наманган вилоятида ҳам шунга ўхшаш ҳолат қайд этилган. Департаментнинг вилоят бошқармаси томонидан ўтказилган тезкор тадбирда Наманган шаҳар Санитария-эпидемиологик осойишталик ва жамоат саломатлиги бўлими шифокор ёрдамчиси А.С. ушланган. У фуқаро М.О. номига шаҳар ҳудудида нодавлат мактабгача таълим муассасаси очиш учун ижобий хулоса олиб бериш эвазига 1,2 млн сўм олган вақтида ашёвий далиллар билан қўлга олинган.

Мазкур ҳолатлар юзасидан Ўзбекистон Республикаси Жиноят кодексининг 25, 168-моддаси (фирибгарлик) ҳамда 25, 211-моддаси (пора бериш) билан жиноят ишлари қўзғатилган. Ҳозирда тергов ҳаракатлари олиб борилмоқда.

Эслатиб ўтамиз, аввалроқ Хоразм вилоятининг Ҳазорасп туманида газ таъминоти бўлими ходимларининг йирик миқдорда пул талаб қилгани фош этилгани ҳақида хабар берилганди.