Россиядаги сафарбарлик рус армияси қулаганини тан олишдир – Зеленский

Россия Федерациясининг сафарбарлик тўғрисидаги қарори уларнинг ўнлаб йиллар давомида бировникини эгаллаш учун тайёрлаган армияси чидай олмай, парчаланиб кетганини тан олишдир. Украина Президенти Владимир Зеленский шундай баёнот берди.

“Россиянинг сафарбарлик тўғрисидаги қарори, бировникини қўлга олиш учун ўнлаб йиллар давомида ўқитилган уларнинг армияси бунга чидай олмай, парчаланиб кетганини очиқ тан олишдир. Энди эса сафарбарлик туфайли Россиянинг Украинага қарши уруши аксарият рус фуқаролари учун телевизор ёки интернетдаги эмас, балки ҳар бир рус уйига кирган воқеликдир”, дейди Зеленский анъанавий видеомурожаатида.

Президентнинг сўзларига кўра, “барчага аёнки, Россиянинг ўзи ўз қўллари билан музокаралар олиб бориш истиқболини яширади”.

“Россия шаҳарларида сафарбарликка қарши норозилик намойишлари бўлиб ўтди – гарчи оммавий бўлмаса ҳам, улар ўтказилди. Ва бу кўрсаткич. Фақат Москва ва Санкт-Петербургда эмас. Биз Россия ҳудудларидаги ҳақиқий кайфият ҳақида биламиз.

Биз Доғистонда, Бурятияда, Россиянинг бошқа миллий республикалари ва минтақаларида одамлар шунчаки ташлаб кетилганини тушунаётганини кўряпмиз. Ўлимга ташланган.

Нега, масалан, доғистонликлар ёки бошқа бировлар Харьков вилоятида ёки Донецк яқинида ўлиши керак? Ҳа, чунки Россияда бир киши шундай қарор қилди – Россиянинг барча фуқаролари учун. Бошқа сабаб йўқ. У шуни хоҳлайди”, дейди Зеленский.

Украина раҳбари “урушнинг олти ойи давомида 55 минг россиялик аскарлар ҳалок бўлганини” айтди.

“Ушбу урушда олти ой ичида 55 минг рус аскари ҳалок бўлди. Ўн минглаб одамлар яраланган, майиб бўлган. Кўпроқ истайсизми? Йўқми? Унда норозилик билдиринг. Жанг. Қочиб кетиш. Ёки Украина асирлигига таслим бўлинг. Булар сизнинг омон қолишингиз учун вариантлардир”, дейди у.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди.