Россияда собиқ шаҳар ҳокими ва унинг рафиқаси ўлдириб кетилди

Россиянинг Самара шаҳри собиқ мэри Виктор Тархов ва унинг рафиқаси Наталья Финляндиядан қайтиб келганидан кейин Самарадаги квартирасида ўлдириб кетилди. Бу ҳақда Самара вилояти Тергов бошқармаси хабар берди.

Қайд этилишича, улар сўнгги йилларда Россиядан ташқарида яшаб келган. Жиноятга алоқадорликда уларнинг набираси гумон қилинмоқда. У ҳибсга олинган, бироқ ҳозирча кўрсатма беришдан бош тортмоқда. Дастлабки маълумотларга кўра, қотиллик тахминан бир ой олдин содир этилган ва собиқ мэр ва унинг рафиқасининг жасадлари бочкалар ичига яширилган. Собиқ мэрнинг набираси ҳозирда жазони ижро этиш колониясида сақланмоқда.

Аввалига маҳаллий ОАВ кекса жуфтлик отиб ўлдирилганини хабар қилган, бироқ кейинчалик бу маълумот аниқлаштирилиб, Тарховлар калтаклаб ўлдирилгани, шундан сўнг жасадлар бочкалар ичида сақлангани ошкор бўлди.

ТАССга кўра, жиноятда асосий гумонланувчи Тарховларнинг набираси бўлиб, кеча, 5 февраль куни Самара суди уни ҳибсга олган. Россия Жиноят кодексининг 105-моддаси 2-қисми (икки ва ундан ортиқ шахсни ўлдириш) бўйича жиноий иш очилган. Агентлик манбасининг айтишича, ҳибсга олинган шахс тергов билан ҳамкорлик қилишдан бош тортмоқда.

“Честный детектив” Telegram-канали маълумотларига кўра, гумонланувчининг исми Екатерина бўлиб, у атиги 18 ёшда.

“Волга Ньюс” нашри ҳуқуқ-тартибот идоралари манбаларига асосланиб, Тарховлар Самарадаги квартирасига кирганини, шундан сўнг уларнинг набираси у ерга келганини хабар қилган. Шунингдек, уларнинг квартирадан қайтиб чиқмаганини, аммо набираси бир неча кун давомида қора пакетларни ташқарига олиб чиқиб кетганини қайд этган. Бундан ташқари, у бочкалар ҳам сотиб олган.

Тергов версиясига кўра, гумонланувчи қотилликдан кейин ўлдирилганларнинг мулкини сотган: иконалар тўплами ва автомобиллар, жумладан, Toyota RAV4’ни. Терговчилар айнан Тарховнинг машинасини сохта ишончнома билан сотишга уринишидан кейин гумон пайдо бўлганини билдирган.

“Честный детектив” ҳуқуқ-тартибот идораларидаги манбаларига таяниб хабар беришича, Екатерина аввалроқ бобоси ишлаган нефть маҳсулотларини қайта ишлаш компаниясига келиб, сохта имзолар қўйилган ҳужжатлар билан ишлашга уринган. Ишчилар имзолар Тарховга тегишли эмаслигини сезган, бироқ набира бобоси шифохонада ётганини ва унга барча ишларни ишониб топширганини айтиб ишонтирган.

Терговчиларнинг тахминича, гумонланувчининг ҳамтовоқлари ҳам бўлиши мумкин.

Жиноят сабаблари ҳозирча аниқ эмас. “Mash” Telegram-канали эҳтимолий сабаб сифатида қасос версиясини илгари сурмоқда. Олдинроқ Тарховнинг қизи ва набираси 7 миллион рубль қарз туфайли квартирасидан маҳрум бўлган. Бироқ бу ишда Виктор Тарховнинг ўзи иштирок этмаган. “Волга Ньюс” портали хабарига кўра, 2016 йилда собиқ мэрнинг қизи ва набираси 130 квадрат метр майдонга эга квартирадан узоқ суд жараёнлари оқибатида ажралиб қолган. Уй гаровга қўйилиб, қарз қайтарилмаганидан кейин янги эгаларига ўтган.

Шу боис жиноятнинг энг эҳтимолий сабаби Виктор Тархов ва унинг рафиқаси активларини сотишдан тушган пул бўлиб қолмоқда.

“Коммуналный опер” Telegram-канали муаллифининг ёзишича, у мактабда Екатерина Тархова билан бирга ўқиган. У Тарховани “бой ота-онанинг эрка қизи”, деб атаган. 

“Ўқитувчилар ундан даҳшатда эди. Синфдошлари ҳатто бир марта флешмоб уюштириб, иншо ёзишганди: “Орзуим – Катя Тархова ўлса”. Унга кўпчилик ҳасад қиларди, лекин мен унга доим раҳмим келарди. Мен билардимки, ундан ўзи билан шуғулланилмаган, фақат чексиз пул билан тарбияланган бола чиқади. Назаримда, бобоси унга энди пул бера олмаган. Унга қадрли бўлган ягона нарса йўқолган. Энди бобоси ҳам керак бўлмай қолган”, деб ёзади у.

Виктор Тархов ким эди?

Виктор Тархов – Самара шаҳрининг собиқ мер бўлиб, 2006-2010 йилларда ушбу лавозимга эгалик қилган.

Совет йилларида у “Куйбышев” вилоят ижроия қўмитасини бошқарган, “Куйбышев” спирт заводи директори бўлган. Кейинчалик “Новокуйбышев” нефтни қайта ишлаш заводи бош директори лавозимида ишлаган, Юкос компаниясида фаолият юритган, вилоят думаси депутати этиб сайланган ва губернаторлик сайловларида ҳам қатнашган.

2006 йилда у Самара мерлиги учун сайловда 56 фоиз овоз билан ғалаба қозонган. 2010 йилда қайта сайланишга уринган, бироқ ютқазиб, бизнес билан шуғулланган. “Самара онлайн” портали хабарига кўра, 2022 йилда у Европага доимий яшаш учун кетган ва яқинда қайтиб келган бўлган.

Эслатиб ўтамиз, аввалроқ Россия пойтахти Москвадаги “Алые паруса” тураржой мажмуасида “АрБат” алоҳида махсус бўлинмалари батальонининг асосчиси Армен Саркисян портлатиб юборилганди. Мажмуада содир бўлган портлашни содир этган эркакнинг ўзи ҳам ушбу жараён давомида ҳалок бўлган. Тергов Саркисяннинг ўлдирилишининг бир қанча сабабларини, жумладан, шахсий қасосни ҳам кўриб чиқмоқда.