Россия уруш бошланганидан бери Украинага нечта ракета учирди? 

Жорий йилнинг 24 февралидан бери Россия армияси Украинага 1474 та ракета зарбаси бериб, 2275 та турли ракеталардан фойдаланган. Бу ҳақда Украина Президенти Владимир Зеленский маълум қилди.

“Босқинчилар бизга қарши жуда шафқатсиз уруш олиб бормоқда. Дарҳақиқат, Европа қитъасида 77 йилдан бери бундай уруш бўлмаган. Оммавий уруш. Душман имкон қадар кўпроқ одамларни ва инфратузилмани йўқ қилишга уринади”, дейди у. 

Зеленскийнинг эслатишича, русларнинг Десна қишлоғига ракета зарбаси бериши натижасида 87 киши ҳалок бўлган. 

“Бу атиги 4 та ракета эди. Умуман олганда, 24 февралдан бери Россия армияси 2275 та турли ракеталардан фойдаланган ҳолда Украинага 1474 та ракета зарбаси берди. Уларнинг катта қисми фуқаролик нишонларига”, дея таъкидлаган Зеленский. 

Унинг қўшимча қилишича, уч ойдан камроқ вақт ичида Россия самолётлари ва вертолётлари томонидан 3000 дан ортиқ ҳаво зарбалари берилган. 

“Бошқа қайси давлат бундай миқёсдаги зарбаларга дош берди? Биз ҳар сафар ҳамкорларимизга замонавий ракетага қарши қуроллар, замонавий жанговар авиация кераклигини айтар эканмиз, шунчаки расмий илтимос билан чекланмасдан, бу илтимосимиз кўплаб одамларнинг ҳаётидир, деймиз”, деган у.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.