Путин Тўқаевга ҳам Трамп билан нимага келишгани ҳақида гапириб берди

north_east

Трамп Путинга қизил гилам тўшади. Улар ниҳоят бирга

Россия Президенти Владимир Путин кеча, 17 август куни Қозоғистон Президенти Қосим-Жомарт Тўқаев билан телефон орқали мулоқот қилиб, Аляскадаги Россия-Америка саммити натижалари ҳақида ахборот берди. Бу ҳақда икки давлат раҳбарларининг матбуот хизмати хабар берди.

Тўқаев Аляскада АҚШ Президенти Дональд Трамп билан бўлган музокаралари билан табриклади. Тўқаевнинг сўзларига кўра, саммит Америка томонининг Кремлнинг Украина бўйича позициясини тушунишини яхшилаган, бу эса “ушбу мураккаб масала бўйича умумий тил” топишга ёрдам беради.

Қозоғистон раҳбарининг таъкидлашича, Аляскадаги учрашув “жаҳон миқёсида ўзаро тушуниш” доирасида Россиянинг позициясини мустаҳкамлашда муҳим воқеадир. Тўқаевга кўра, кескин вазиятда музокараларнинг ташкилий даражаси катта сиёсий аҳамиятга эга.

Путин, ўз навбатида, Тўқаевга Аляскада бўлиб ўтган музокараларнинг айрим ўзига хос жиҳатлари ҳақида маълумот берди.

Шунингдек, Россия-Қозоғистон ҳамкорлиги кун тартибидаги айрим долзарб масалалар, жумладан, энергетика соҳасида ўзаро манфаатли қўшма лойиҳаларни амалга ошириш жараёнига ҳам тўхталиб ўтилган.

Путин шу куни беларуслик Александр Лукашенко билан ҳам телефон орқали мулоқот қилди. Россия етакчиси Анкорижда АҚШ Президенти билан бўлиб ўтган музокаралар натижалари ҳақида маълум қилди. Александр Лукашенко Украина инқирозини тинч йўл билан ҳал қилиш бўйича кўрилаётган қадамларни олқишлади ва ўз навбатида, Дональд Трамп билан 15 август куни бўлиб ўтган телефон мулоқоти ҳақида гапирди.

Қайд этиш жоиз, 8 август куни Путин Ўзбекистон Президенти Шавкат Мирзиёев, Қозоғистон Президенти Қосим-Жомарт Тўқаев, Хитой раҳбари Си Цзиньпин ҳамда Ҳиндистон Бош вазири Нарендра Моди билан ҳам телефон орқали суҳбат ўтказганди. Ўшанда Путин деярли барча суҳбатларида 6 август куни Москва шаҳрида АҚШ Президентининг махсус вакили Стив Уиткофф билан ўтказилган музокараларнинг асосий натижалари ҳақида маълумот берган. 

Эслатиб ўтамиз, Путин кеча, 17 август куни Ўзбекистон Президенти Шавкат Мирзиёев билан ҳам телефон орқали мулоқот қилиб, унга ҳам 15 август куни Анкориж шаҳрида ўтган Россия-АҚШ саммитининг асосий натижалари тўғрисида маълумот берганди.