Покистонда намойишчилар ва полиция ўртасида оммавий тўқнашув юз берди

Исломободда бугун, 26 ноябрь куни Покистоннинг собиқ бош вазири Имрон Хоннинг озод этилишини талаб қилган намойишчилар парламент биноси олдида хавфсизлик кучлари билан тўқнашди. Бу ҳақда маҳаллий матбуот хабар берди.

Икки шаҳар шифохонаси шифокорларига кўра, полиция ва намойишчилар ўртасидаги тўқнашувлар оқибатида камида олти киши ҳалок бўлган, 50 га яқин киши жароҳатланган.

Маҳаллий ҳокимият маълумотларига кўра, тўрт нафар хавфсизлик ходими ҳалок бўлган. Мамлакат Ички ишлар вазирлиги раҳбари Моҳсин Нақви намойишчилар билан ҳеч қандай музокара олиб бормасликни талаб қилди. Кўздан ёш оқизувчи газ ишлатилган.

Қамоқдаги Имрон Хон ўз тарафдорларини “талаблар бажарилмагунча” кўчаларни тарк этмасликка чақирди. Покистон ҳукуматининг собиқ раҳбари Х ижтимоий тармоғида намойишчилар "ўз ҳуқуқларини ҳимоя қилишлари" ва "тинч намойишларда иштирок этишлари" ҳақида ёзган.

Хоннинг энг йирик мухолифат партияси “Адолат ҳаракати” тарафдорлари ҳуқуқ-тартибот идоралари ходимлари билан тўқнашувлардан қўрқмаслигини айтишмоқда.

"Биз халқ ҳуқуқлари учун курашаётган Имрон Хон учун барча тўсиқлар ва азоблардан ўтдик ва улар Хонни озод қилмагунча бу ердан кетмаймиз. Биз Хон учун ўлимга тайёрмиз", дейди намойишчилардан бири ва мухолифат партия тарафдори Аднан Хон.

Дипломатик ваколатхоналарни ҳимоя қилиш учун ҳарбийлар Президент, Бош вазир, Ташқи ишлар вазирлиги, Ички ишлар вазирлиги, парламент, Олий суд ва дипломатик ваколатхоналар жойлашган ҳукумат кварталига (“қизил зона”) юборилди.

Имрон Хон 2018 йилдан 2022 йилгача Покистон бош вазири лавозимида ишлаган ва парламентда ишончсизлик вотуми ўтказилгандан сўнг лавозимидан четлаштирилган. Ўшандан бери собиқ бош вазирга қарши 50 дан ортиқ жиноий иш қўзғатилган, террорчиликка оид ишлар шулар жумласидандир.

Аввалроқ, хусусан, у жиноий даромадларни легаллаштиришда айбланиб, 3 йилга, давлат сирларини ошкор қилганлик учун 10 йилга, рафиқаси билан бирга коррупция иши бўйича 14 йилга озодликдан маҳрум этилган эди. Эр-хотин барча айбловларни рад этиб, ишни сиёсий мотивли деб атади. Хоннинг партияси ҳам уларни уйдирма деб ҳисобларди.