“Open budget” доирасида қурилган стадион 1 ойга етмай қулаб тушди

Ижтимоий тармоқларда Жиззах вилоятининг Бахмал туманида “Open budget” лойиҳаси доирасида қурилган 1,1 млрд сўмлик стадион фойдаланишга топширилганига 1 ой бўлмасдан қулаб тушгани ҳақида хабарлар тарқалди. Мазкур ҳолат юзасидан Жиззах вилояти ҳокимлигининг “Ягона буюртмачи хизмати” ИК ДУК муносабат билдирди.

Қайд этилишича, туманнинг “Мустақиллик” маҳалласида жойлашган 48-мактаб ҳудудида қурилган сунъий қопламали стадион Жиззах вилояти ҳокимлиги “Ягона буюртмачи хизмати” ДУК буюртмачилигида ҳамда “Сувиншоот қурилиш лойиҳа” МЧЖ пудратчилигида қурилган бўлиб, лойиҳа шартнома қиймати 1 миллиард 190 миллион сўмни ташкил этади.

Дастлабки ўрганиш натижаларига кўра, стадионнинг том қисмининг қулаб тушишига кучли табиий офат – шамол ва қалин қор ёғиши сабаб бўлгани аниқланган. Бунинг оқибатида спорт майдончасининг том қисми зарар кўрган. Ҳодиса оқибатида тан жароҳати олган шахслар аниқланмаган.

Билдирилишича, ҳолат юзасидан буюртмачи ва пудратчи ташкилотлар томонидан ўрганиш ишлари олиб борилмоқда.

“Пудрат ташкилоти томонидан лойиҳага мувофиқ тиклаш ишлари амалга оширилади ва стадион тез кунларда қайта тикланиб, фойдаланишга топширилади”, дейилади муносабатда.

Эслатиб ўтамиз, аввалроқ Фарғона вилояти Боғдод туманида ўтган йили август ойида таъмирланган йўл машиналар ўтаётганда ўпирилиб кетган эди.