Nvidia раҳбари хитойлик жосус аёл билан ишқий муносабатда бўлган – разведка

Америка ҳукумати Nvidia бош директори Женсен Хуанг Хитой Давлат хавфсизлиги вазирлиги томонидан ёлланган аёл билан ишқий муносабатларда бўлган деб ҳисоблайди. Гап Nvidia маҳсулотларини сотиб олувчи Сингапурнинг Megaspeed компанияси топ-менежери Элис Хуанг ҳақида бормоқда. Бу ҳақда манбаларга таяниб, “Financial Times” нашри ёзмоқда.

Америка разведкаси маълумотлари асосидаги меморандум мулозимлар томонидан жорий йилда тайёрланган. Ҳужжат АҚШ Президенти Дональд Трампнинг Хитой Халқ Республикаси Раиси Си Цзиньпин билан саммит учун Пекинга ташрифидан сал олдин Оқ уй администрациясининг тор доирадаги юқори мартабали вакилларига топширилган. Аввалроқ, компания Хуанг ҳар йили минглаб мижоз-фирмалар раҳбарлари билан учрашишини маълум қилган.

Нашрнинг ёзишича, 2023 йилда Хитой ўйин компаниясидан ажратиб олинган Megaspeed’ни АҚШ ҳокимияти экспорт чекловларини айланиб ўтиб, Nvidia’нинг илғор чипларини Хитойга контрабанда қилишда гумонламоқда. Nvidia’нинг ички текшируви ҳеч қандай ҳуқуқбузарликни аниқламаган. FT маълумотларига кўра, миллий хавфсизлик учун масъул бўлган Америка мулозимлари Хуангдан норози, чунки у жорий йилда Трампни Хитой мижозларига H200 СИ-чипларини (сунъий интеллект чипларини) сотишга шахсан кўндирган.

Хуанг Трампнинг иккинчи муддати бошланганидан бери у билан бир неча бор учрашган. Май ойида, Nvidia раҳбари у билан бирга Хитойга учиб кетган тадбиркорлар орасида йўқлигини билиб, Трамп унга қўнғироқ қилган ва Хуанг Аляскадаги тўхташ вақтида Президент самолёти бортига қўшилган. Сентябрь ойида у Трамп Сининг АҚШга ташрифи шарафига уюштирган тантанали кечки овқатда иштирок этган.

Жорий йилнинг 29 октябрь куни “The New York Times” нашри АҚШ разведкаси хулосаларига таяниб, Элис Хуанг Пекинга маълумот узатгани ва Nvidia раҳбари Хитой жосуслик операциясининг нишонига айлангани ҳақида хабар берган. Газета маълумотларига кўра, Трампга бу ҳақда тахминан бир йил олдин ахборот берилган, аммо у ҳеч қандай чора кўрмаган. Nvidia Хуангнинг Megaspeed вакили билан алоқаларини одатий бизнес амалиёти, Хитой ТИВ эса “асоссиз уйдирмалар” деб атаган. FT мақоласи чоп этилиши арафасида Вакиллар палатасининг соҳавий комитетларига бошчилик қилувчи республикачилар Хуангдан ёпиқ кўрсатма беришни сўраган.