“Ноттингем Форест” тез орада янги бош мураббийга эга бўлади

Англиянинг “Ноттингем Форест” жамоаси бош мураббий лавозими учун Шон Дейч билан келишувга эришди. Дейч тез орада жамоанинг янги бош мураббийи сифатида таништирилади. Бу ҳақда инсайдер Фабрицио Романо хабар берди.

Шон Дейчнинг прагматик услуби ва жамоани рағбатлантириш қобилияти “Форест”ни ушбу мавсумда Премьер-лигада сақлаб қолишда муҳим роль ўйнаши кутилмоқда. “Ноттингем Форест” 18 октябрда, атиги 39 кун фаолият юритганидан кейин Анже Постекоглунинг ишдан бўшатилганини эълон қилган эди. Постекоглу сентябрда Нуно Эспирито Санто ўрнини эгаллаган, аммо Премьер-лиганинг бешта ўйинида фақат бир очко тўплаб, жамоани 18-ўринда қолдирган.

Маълумот учун, 54 ёшли Шон Дейч аввал “Честерфилд”, “Бернли” ва “Эвертон” жамоаларида бош мураббий сифатида фаолият юритган. Музокаралар якуний босқичда бўлиб, унинг 2027 йилгача шартнома имзолаши кутилмоқда. Дейчнинг “Ноттингем Форест”даги дебют учрашуви жорий йилнинг 23 октябрида, Европа лигасида “Порту”га қарши бўлиб ўтади.

Эслатиб ўтамиз, аввалроқ Швеция футбол федерацияси инглиз мутахассиси Грэм Поттерни миллий терма жамоанинг янги бош мураббийи этиб тайинлаганини эълон қилганди.