“Мультфильмлар билан уруш”. Песков Киевнинг санкцияларини танқид қилди

Россия Президенти матбуот котиби Дмитрий Песков Украинанинг “Қизалоқ ва маймоқ” мультфильми ижодкорларига қарши жорий қилган санкцияларини “мультфильмлар билан уруш” деб атади. Бу ҳақда у бугун, 21 август куни Москвада ўтказилган брифингда сўз очди.

“Украина мультфильмлар билан ҳам уруш бошлагани Киев режимининг “хунуклиги”ни яна бир бор кўрсатмоқда”, деган Песков.

Унинг қўшимча қилишича, Москва санкцияларни ноқонуний деб билади. “Қизалоқ ва маймоқ” мультфильми бутун дунёни меҳрибонлиги ва инсонийлиги билан забт этган. Мультфильм инсониятнинг энг яхши фазилатларини тарғиб қилгани билан машҳур бўлган.

Эслатиб ўтамиз, Украина Россиянинг “Қизалоқ ва маймоқ” мультсериали ижодкорларига қарши 10 йил муддатга санкциялар жорий қилганди. Чекловлар “Анимаккорд” студияси ҳамда лойиҳа билан боғлиқ беш нафар жисмоний ва тўртта юридик шахсга нисбатан киритилган. Украина Президенти Владимир Зеленский сайтида мультфильм мамлакат миллий хавфсизлигига таҳдид сифатида баҳоланган. Москва эса санкцияларни ноқонуний деб ҳисобламоқда.

“Қизалоқ ва маймоқ” рус халқ эртаги асосида яратилган бўлиб, қизалоқ ва маймоқнинг саргузаштлари ҳақида ҳикоя қилади.