Москвага етиб боришга қодир ракета тез орада тайёр бўлади – Зеленский

Украина армияси Россия армиясининг янги тактикасига жавобан Россия нефтни қайта ишлаш заводларига бериладиган зарбаларни кучайтиради. Бу ҳақда Украина Президенти Владимир Зеленский “Reuters”га берган интервьюсида сўз очди. 

Унинг сўзларига кўра, Украина махсус хизматлари Россия Президенти Владимир Путин қиш олдидан анча кенгроқ фуқаролик объектлари доирасига ҳаво зарбалари беришни кўзда тутувчи “янги доктрина”ни тасдиқлаганини исботловчи ҳужжатларни қўлга киритган.

“Биз ҳужжатларни кўрдик ва инфраструктура ҳамда логистикага зарбалар беришга, энг муҳими – шаҳар ва қишлоқларга ҳужум қилишга, ҳамма жойга: йўлларга, мактабларга, шифохоналарга зарба беришга рухсат берилганини биламиз. Одамларни пойтахт ва бошқа шаҳарларни тарк этишга мажбур қилиш – ушбу операциянинг мақсади ана шундан иборат”, дейди Зеленский.

Қайд этиш жоиз, охирги ҳафта давомида Киев узлуксиз ракета ва дронлар ҳужумига учрамоқда. Энергетика ва алоқа объектлари, йўл ва темир йўл инфратузилмаси зарба остида қолди. Бундан ташқари, Россия илк бор Киевнинг икки қисмини боғлаб турувчи Днепр орқали ўтган кўприкларга зарба бермоқда. Кеча, 3 октябрь куни Россия ТИВ баёнот эълон қилиб, унда Россия томони май ойидаёқ “Киевда бўлиб турган хориж фуқаролари ва дипломатларини шаҳарни тарк этишга, Украинага сафар қилишдан воз кечишга чақиргани” айтилган эди.

“Шуни таъкидлаймизки, ҳамма ҳам ушбу огоҳлантиришларга қулоқ тутгани йўқ ва ўз ҳаётларини онгли равишда ўлим хавфи остига қўймоқда. Киевда кўплаб элчихоналар ишламоқда, Украинага ташриф билан хорижий расмий шахслар келмоқда. Россия Федерацияси Қуролли кучлари оммавий қасос зарбаларини беришни давом эттиради”, дейилади баёнотда.

FP-9 ракетаси

Зеленский “Reuters”га берган интервьюсида, шунингдек, Украинанинг Fire Point компанияси томонидан ишлаб чиқилаётган узоқ масофага мўлжалланган FP-9 баллистик ракетаси шу куздаёқ тайёр бўлишини маълум қилди. Ишлаб чиқарувчи ракетанинг учиш масофаси 855 кмгача, жанговар қисмининг оғирлиги эса 800 кггача эканини билдирмоқда. Шу тариқа, FP-9 Москвагача етиб бориш имкониятига эга бўлади.

Эслатиб ўтамиз, аввалроқ Украина маҳаллий ишлаб чиқилган FP-7 тактик баллистик ракетасини илк бор жанговор шароитда қўллагани ҳақида хабар берилган эди.