Мирзиёев Туркманистон ТИВ раҳбарини қабул қилди

Ўзбекистон Республикаси Президенти Шавкат Мирзиёев бугун, 27 январь куни навбатдаги Ўзбекистон-Туркманистон сиёсий маслаҳатлашувлари доирасида мамлакатда бўлиб турган Туркманистон Вазирлар Маҳкамаси раисининг ўринбосари, Ташқи ишлар вазири Рашид Мередовни қабул қилди. Бу ҳақда Президент матбуот хизмати хабар берди.

Суҳбат аввалида вазир Рашид Мередов давлат раҳбарига Туркманистон Президенти Сердар Бердимуҳамедов ва Туркман халқининг миллий етакчиси, мамлакат Халқ Маслаҳати Раиси Гурбангули Бердимуҳамедовнинг самимий саломи ва эзгу тилакларини етказди.

Мулоқот давомида Ўзбекистон-Туркманистон дўстлик, яхши қўшничилик ва стратегик шериклик муносабатларини янада ривожлантириш ва мустаҳкамлашнинг долзарб масалалари муҳокама қилинди.

"Товар айирбошлаш ҳажми жадал ўсиб бораётгани, 2024 йилда 1,1 миллиард доллардан ошгани мамнуният билан қайд этилди. "Шовот-Тошовуз" чегараолди савдо зонаси биргаликда барпо этилмоқда. Саноат кооперацияси, энергетика, транспорт ва логистика, қишлоқ хўжалиги ва сувдан фойдаланиш соҳаларида яқин ва ўзаро манфаатли ҳамкорлик изчил давом эттирилмоқда. Ҳудудлараро алоқалар ва маданий-гуманитар алмашинувлар кенгайиб бормоқда", дейилади хабарда.

Шунингдек, Тошкент шаҳрида Гурбангули Бердимуҳамедовнинг "Hakyda göwheri" ("Тафаккур гавҳари") номли янги китобининг ўзбек тилидаги нашри тақдимоти ўтказилгани учун Туркманистон раҳбарияти номидан Ўзбекистон етакчисига чуқур миннатдорлик изҳор этилди.

"Ўзбекистон ва Туркманистон ўртасидаги кўп қиррали шерикликнинг янги кенг қамровли кун тартибини шакллантириш, бўлажак олий даражадаги ташрифлар, минтақа давлатлари раҳбарларининг Маслаҳат учрашуви ва "Марказий Осиё плюс" форматидаги саммитларга тайёргарлик кўришга алоҳида эътибор қаратилди. Шунингдек, халқаро сиёсат масалалари юзасидан ҳам фикр алмашилди", дейилади хабарда.

Эслатиб ўтамиз, 25 январь куни Президент Шавкат Мирзиёев ташриф билан Ўзбекистонда бўлган Қирғизистон Президенти Садир Жапаров билан “Амирсой” курорт мажмуасида норасмий учрашув ўтказганди.