Мирзиёев Қирғизистонга етиб борди (фото)

Ўзбекистон Республикаси Президенти Шавкат Мирзиёев амалий ташриф билан Қирғизистоннинг Чўлпонота шаҳрига борди. Аэропортда давлат раҳбарини Қирғиз Республикаси Вазирлар Маҳкамаси Раиси – Президент Администрацияси раҳбари Оқилбек Жапаров ва бошқа расмий шахслар кутиб олган.

Бугун, 2 июнь куни Чўлпонотада иккинчи “Марказий Осиё – Европа Иттифоқи” саммити бўлиб ўтади. Унинг кун тартибидан минтақа мамлакатларининг Евроиттифоқ билан конструктив мулоқотини янада ривожлантириш ва амалий ҳамкорлигини кенгайтириш масалалари ўрин олган.

Маълумот учун, ўтган йилнинг 27 октябрь куни Остона шаҳрида Марказий Осиё давлатлари етакчилари ва Европа кенгаши раҳбари Шарль Мишелнинг биринчи учрашуви бўлиб ўтган.

Эслатиб ўтамиз, жорий йилнинг 19 май куни Олмаота шаҳрида “Марказий Осиё – Европа Иттифоқи” иккинчи иқтисодий форуми бўлиб ўтганди. Айнан шу куни Хитойнинг Сиань шаҳрида “Марказий Осиё-Хитой” саммити илк бор офлайн форматда бўлиб ўтди. Бунгача 9 майда Марказий Осиё етакчилари Москвада Путин билан кўришган ва Қизил майдондаги Ғалаба парадида қатнашганди. 25 май куни эса Москвадаги Катта Кремль саройида бўлиб ўтган Олий Евроосиё иқтисодий кенгашининг кенгайтирилган таркибдаги мажлисида Россия Президенти Владимир Путин билан бирга Марказий Осиё етакчиларидан Қозоғистон Президенти Қосим-Жомарт Тўқаев, Қирғизистон Президенти Садир Жапаров шахсан иштирок этди, Ўзбекистон Президенти Шавкат Мирзиёев ва Тожикистон раҳбари Имомали Раҳмон эса онлайн қатнашди.