Медведев Ғарб санкциялари ноқонуний эканини иддао қилди

Олам

image

Россия Хавфсизлик Кенгаши раҳбари ўринбосари Дмитрий Медведев Ғарб расмийларини россиялик сиёсатчиларнинг қариндошларига қарши санкциялар қўллаётганини танқид қилди. Бу ҳақда у ўзининг Telegram саҳифасида ёзиб қолдирган.

“Ғарб ўтмишдаги илғор тажрибаларни такрорлашга қарор қилганга ўхшайди. Келинг, санкцияларни олайлик. Бу ерда икки томонлама қонунсизлик бор. Чунки Ғарбда ўйлаб топилган қонунбузарликлар учун нафақат сиёсий воқеалар иштирокчилари – давлат арбоблари ёки депутатлар, балки қоидабузарликларга ҳеч қандай алоқаси бўлмаган оила аъзоларини ҳам жавобгар қилмоқда. Европа ва америкалик қонунчилар шундай қарорга келгани учун мутлақо айбсизлар жавоб беради.

Келинг, биз ҳам уларнинг оила аъзоларининг ҳисобларини, мулкларини музлатиб қўяйлик, уларни чегарадан ўтказмайлик”, дейди у.

Медведевнинг сўзларига кўра, Ғарб келажакда яна бошқа оилавий қоидаларни ва уларга нисбатан жазо чораларини ҳам қўллаши мумкин.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.


Мақола муаллифи

Теглар

Россия-Украина уруши Украинага босқин

Баҳолаганлар

6

Рейтинг

3.5

Мақолага баҳо беринг

Дўстларингиз билан улашинг