Макгрегор жанг бўйича Трамп билан музокаралар олиб бормоқда – ОАВ

UFC жангчиси Конор Макгрегор Оқ уйда ўтказилиши кутилаётган жанг бўйича UFC билан эмас, балки АҚШ Президенти Дональд Трамп маъмурияти билан музокаралар олиб бормоқда. Бу ҳақда “Irish Independent” нашри хабар берди.

Манба маълумотларига кўра, Макгрегор келаси ёзда Оқ уйда ўтказилиши режалаштирилаётган тадбирда жанг қилишга кучли иштиёқ билдирган. Бу тадбир UFC президенти Дана Уайт ва Дональд Трамп томонидан ташкил қилинмоқда. Ирландиялик жангчи ҳатто узоқ йиллик рақиби Майкл Чендлерга қарши жанг аллақачон дастурга киритилганини таъкидлаган. Бироқ Макгрегорнинг сўзларига кўра, у UFC’ни четлаб ўтиб, ўз иштироки бўйича тўғридан тўғри Трамп билан музокаралар олиб бормоқда. 

“Мен бу жанг учун одатдагидек UFC билан ўз номимдан эмас, балки Ирландия номидан Америка Қўшма Штатлари билан музокаралар олиб боряпман. Бу ғалати ҳолат. Трамп ва унинг маъмурияти мени тўлиқ қўллаб-қувватлаяпти ва ушбу кечани интизорлик билан кутмоқдаман”, дейди Конор.

Қайд этиш жоиз, Оқ уй раҳбари Трамп жорий йил бошида ўз мамлакатининг 250 йиллигини нишонлаш учун ушбу манзилда жанглар ўтказишни истаётганини билдирган. 56 ёшли Уайт эса яқинда мазкур вазият юзасидан келишувга эришилганини маълум қилган.

Маълумот учун, бу Макгрегор учун сўнгги 4 йилликдаги биринчи жанг бўлади. 2021 йилда у эски рақиби Дастин Порьега кетма-кет иккинчи маротаба мағлуб бўлиб, оёғини синдириб олган эди. Март ойида жангчи АҚШ маъмуриятининг Авлиё Патрик куни тадбирлари доирасида Оқ уйга ташриф буюрган. Бу ташриф давомида Конор Ирландиядаги муҳожирлик масаласига бўлган эътирозини билдириш ва АҚШдан ёрдам сўраш учун фойдаланган. Бу воқеа Трамп Макгрегорни ажойиб инсон деб атаб, уни ўзининг энг севимли ирландиялик шахс сифатида тилга олганидан бир ҳафта ўтиб содир бўлган. Макгрегор январь ойида Трампнинг лавозимга киришиш маросимида ҳам иштирок этган.

Жаҳонгир Иномжонов