Коронавирус авж олган Бразилияда яна бир вирус эпидемияси бошланди

Бразилиянинг Рио-де-Жанейро штатида авж олган “А” гриппи эпидемияси сўнгги уч ҳафта ичида коронавирус инфекциясига қараганда кучли ўткир респиратор синдром ҳолатини кўпроқ келтириб чиқарди. Бу ҳақда бразилиялик эпидемиологлар хабарига асосланиб ТАСС маълум қилди.

“Рио-де-Жанейрода кучли ўткир респиратор синдроми билан касалланган болаларда ҳам, катталарда ҳам “А” гриппи вируси қайд этилган. Маълум бўлишича, бу гриппнинг  SARS-CoV-2 вирусига қараганда тасдиқланган ҳолатлари сезиларли даражада кўп», дейилади илмий уюшма ахборот бюллетенида.

Шунингдек, грипп белгилари билан давлат тиббиёт муассасаларига келувчилар сони одатдагидан тўрт баробар кўплиги аниқланган. Охирги уч ҳафта ичида 23 мингдан ортиқ беморда “А” гриппи, 4,5 мингдан сал кўпроқ ковид ҳолатлари тасдиқланган.

Бундан ташқари, штат расмийлари, сўнгги 14 кун ичида бу инфекция билан касалланиш деярли 240 фоизга  ошганини айтишмоқда.

Маълумот учун, Бразилия коронавирусдан энг кўп жабр кўрган давлатлардан бири ҳисобланади мамлакатда 22 177 059 кишида коронавирус аниқланган. Уларнинг 616 457 нафари вафот этган.

Озода Чориева